सन्तोष दहित
दाङ, मङ्सिर १४ गते । नेकपा (एमाले) का महासचिव शंकर पोख्रेलले ‘एमालेमा दलितको भोट चल्दैन’ भन्ने भ्रामक प्रचार भइरहेको बताउनुभएको छ ।
हालै विभिन्न सञ्चारमाध्यमहरूले एमालेको महाधिवेशनमा दलित सदस्यहरू भोटाधिकारबाट वञ्चित हुने भन्ने समाचार प्रकाशन भएपछि महासचिव पोख्रेलले सामाजिक सञ्जालमार्फत आफ्नो भनाइ राख्नुभएको हो ।
उहाँको अनुसार एमालेको महाधिवेशनमा दलित र गैरदलित दुवै सदस्यले एउटै क्लस्टरमा रहेर भोट हाल्न पाउँछन् । “दलित र गैरदलित दुबैलाई त्यहाँ चुन्न र चुनिने अधिकार सुरक्षित छ,” पोख्रेलले लेख्नुभएको छ ।
तर उहाँका अनुसार दलित समावेशी क्लस्टरमा जानेहरूले भने दलित प्रतिनिधि चयनका लागि मात्र भोट हाल्ने व्यवस्था गरिएको हो । यो व्यवस्था एमालेले समावेशी सिद्धान्त लागू गरेदेखि नै रहेको उहाँले स्पष्ट गर्नुभएको छ ।
महासचिव पोख्रेलले भविष्यमा सबैले सबैका लागि भोट हाल्ने गरी दलित समावेशीताको नयाँ व्यवस्था गर्न सकिने विषयमा पार्टीमा असहमति रहनुपर्ने कुनै कारण नभएको समेत बताउनुभएको छ ।
