गोरखापत्र समाचारदाता
काठमाडौँ, मङ्सिर १४ गते । गीता जयन्तीका अवसरमा गीता ज्ञानको प्रवर्धनमा विभिन्न माध्यमबाट सहयोग गर्नुहुने व्यक्तित्वलाई सम्मान गरिएको छ । जीवनका लागि गीता ज्ञान अभियानद्वारा शनिबार राजधानीमा आयोजित कार्यक्रममा गीता ज्ञानको प्रचार, अध्ययन, अध्यापनमा सहयोग गर्नुहुने व्यक्तित्वलाई सम्मान गरिएको हो ।
केदार बस्नेतको सभापतित्वमा आयोजित कार्यक्रममा वैदिक अनुसन्धान गुठी संस्कार शिक्षा अभियन्ता डा. केएन स्वामी, आचार्य देवेन्द्र घिमिरे, गोविन्द टन्डनलगायतले गीता ज्ञानको पवित्र काममा सघाउनुहुने व्यक्तित्वलाई गीता ज्ञान पुस्तकलगायतका समाग्री प्रदान गरेर सम्मान गर्नुभएको हो ।
सो कार्यक्रममा आँचल बसेल, रेवतीबहादुर बस्नेत, श्यामकृष्ण खड्का, हुतराज बस्नेत, प्राडा नृसिंह खत्री, मधुकर खड्का, प्रकाशसिंह कार्की, गरुडध्वज थापा, डा. गोविन्द बस्नेतलगायतलाई सम्मान गरिएको हो ।
वैदिक अनुसन्धान गुठी संस्कार शिक्षा अभियन्ता डा. स्वामीले श्रीमद्भागवत गीताको ज्ञान हरेक युगका लागि सान्दर्भिक भएको बताउनुभयो । उहाँले भन्नुभयो, “गीता ज्ञान ज्येष्ठ नागरिकले आफ्नो जीवनका लागि अध्ययन गर्नु आवश्यक छ भने बालबालिकालाई सक्षम, अनुशासित नागरिक तयार गर्नका लागि पढाउनु पर्छ ।”
त्यस्तै आचार्य घिमिरेले कोठाभित्र ११ जना बसेर श्रीमद्भागवत गीता पाठ गर्दै सुरु भएको गीता ज्ञानको अभियानले हाल गीता ज्ञान पाठशाला स्थापना गर्ने यात्रासम्म आइपुगेको बताउनुभयो । डा. गोविन्दशरण उपाध्यायले पछिल्लो समय गीता ज्ञानप्रति चासो बढिरहेको र मन, वचन, कर्मले असल बन्न प्रेरित गर्ने श्रीमद्भागवत गीताको अध्ययनले हरेक उमेर समूहका व्यक्तिलाई सरल तरिकाले जीवन र जगत्बारे बुझाउन सफल हुने बताउनुभयो । सो कार्यक्रममा डा. टन्डनले गीता ज्ञानको प्रवर्धनको सुरुवात गर्नुहुने स्वामी चिन्मयानन्दको प्रेरणाले नेपाली भाषामा श्रीमद्भागवत गीता अनुवाद गरिएको प्रसङ्गबारे चर्चा गर्नुभएको थियो । उक्त कार्यक्रममा हरिचन्द्र कमलले रचना गर्नुभएको ‘रैछ गीता ज्ञान, सधैँ अमृत समान’ भजनको म्युजिक भिडियोको लोकार्पण गरिएको थियो ।
