.jpg)
अमृतप्रसाद पौडेल
म्याग्दी,मङ्सिर १४ गते । म्याग्दीको बेनीमा शनिबार सम्पन्न भएको २३ औं अन्तरमावि जेसीज कप फुटबल प्रतियोगिताको उपाधी पहिलो पटक केबी एकेडेमीले जितेको छ । प्रतियोगिताको फाइनलमा ३–१ ले बेनी सामुदायिक माध्यमिक विद्यालय बेनीलाई गर्दै पहिलोपटक केबी एकेडेमीले जेसीज कपको उपाधी जितेको हो ।
बेनी बजारको खुल्लामञ्चमा भएको प्रतियोगिताको फाइनल खेलको २२ मिनेटमै केबी एकेडेमीका बिबेक बुढाले गोल गर्दै केबी एकेडेमीलाई अग्रता मिलेको थियो । त्यसपछि केबी एकेडेमीकै दिक्षित बुढाले ३८ र ४३ मिनेटमा गोल गरेपछि खेलमा अग्रता फराकीलो बनाएको थियो । दोस्रो हाफको अतिरिक्त समयमा बेनी सामुदायिकका सन्दिप क्षेत्रीले एक गोल फर्काएको भए पनि हारबाट जोगिन सकेन ।
यस अगाडि केबी एकेडेमी सन् २०१८ मा आयोजित १७ औं जेसीज कपमा पनि फाइनलमा पुगेको भए पनि उपबिजेता मै चित्त बुझाउन बाध्य भएको थियो । उपबिजेता बेनी सामुदायिक मावि गतवर्षको २२ औं संस्करणमा पनि फाइनलमा पुगेर उपाधीबाट चुकेको थियो ।
प्रतियोगितामा सर्वाधिक गोलकर्ता केबी एकेडेमीका खिमबहादुर थापा, माउण्ट एभरेष्ट आवासीय माविका एञ्जल थजाली र लिटल गार्डेन एकेडेमीका एलिन जुग्जालीले समान पाँच गोल गर्नुभएको थियो । उत्कृष्ट खेलाडी केबी एकेडेमीका होमन जुग्जाली, उत्कृष्ट गोलरक्षक केबी एकेडेमीका सञ्जन घर्ती, उत्कृष्ट डिफेन्डर बेनी सामुदायिक माविका साइरेस पुन, उत्कृष्ट मिडफिल्डर केबी एकेडमीका मौसम रोका, उत्कृष्ट स्ट्राईकर बेनी सामुदायिक माविका सन्दिप क्षेत्री, राईजिङ प्लेयर लिटल गार्डेनका इशान सुबेदी, उत्कृष्ट प्रशिक्षक केबी एकेडेमीका टण्डीन लामा हुनुभएको थियो । त्यस्तै, अनुशासित टिम निस्कोट मावि घोषित भएको प्रतियोगिताका मुल संयोजक नविन पौडेलले जानकारी दिनुभयो ।
प्रतियोगितामा बिजेता विद्यालयलाई गण्डकी प्रदेशसभाका सदस्य हरि भण्डारी, जिल्ला खेलकुद विकास समितिका पूर्व अध्यक्ष कृष्णकुमार विश्वकर्मा लगायतले पुरस्कार वितरण गर्नुभएको थियो । प्रतियोगिताका बिजयी टोलिलाई रनिङ शिल्ड, ट्रफि, मेडल र प्रमाणपत्रसहित नगद ५५ हजार पाँच सय ५५ र उपबिजेताले ट्रफि, मेडल र प्रमाणपत्र सहित नगद ३५ हजार पाँच सय ३५ रुपियाँ प्रदान गरिएको थियो ।
