• १३ मंसिर २०८२, शनिबार

रामपुरमा क्लब स्तरीय भलिबल प्रतियोगिता हुँदै

blog

प्रतियोगिताको बारे जानकारी दिँदै आयोजक । तस्बिरः इमान सिं राना

इमान सिं राना

रामपुर (पाल्पा), मङ्सिर १३ गते । जिल्लाको रामपुरमा क्लब स्तरीय आमन्त्रित भलिबल प्रतियोगिता हुने भएको छ । दोस्रो भम्बक युनाइटेड कपअन्तर्गत मङ्सिर १६ देखि २० गतेसम्म प्रतियोगिता हुन लागेको हो  ।

भम्बक युनाइटेड युथ क्लव रामपुरले र रामपुर नगरपालिकाको संरक्षणमा रामपुर नगरपालिका–५, भम्बकस्थित खेल मैदानमा प्रतियोगिता सञ्चालनको तयारी गरेको हो । प्रतियोगिता बारेमा क्लबले शनिबार पत्रकार सम्मेलन गरी जानकारी दिएको छ । 

युवाहरूलाई खेलकुदप्रति आकर्षित गर्नुका साथै राष्ट्रिय खेल भलिबलको उत्थान एवं नयाँ खेल प्रतिभालाई प्रोत्साहन गर्न प्रतियोगिता सञ्चालन गर्न लागिएको भम्बक युनाइटेड युथ क्लबका अध्यक्ष बालकृष्ण कुमालले बताउनुभयो ।

प्रतियोगितामा होराइजन भलिबल क्लब रूपन्देही, मणिमुकुन्द भलिबल क्लब, रूपन्देही, जिल्ला भलिबल सङ्घ स्याङ्जा, जिल्ला भलिबल सङ्घ पाल्पा, एपिएफ पोखरा, आयोजक भम्बक युनाइटेड युथ क्लव र जिल्ला भलिबल सङ्घ नवलपुर गरी सात वटा क्लबबिच प्रतिस्पर्धा हुने खेल संयोजक अनुप मल्लले जानकारी दिनुभयो । 

राष्ट्रिय तथा अन्तर्राष्ट्रियस्तर चर्चामा रहेका खेलाडीको समेत सहभागिता रहने मल्लले बताउनुभयो । सहभागी क्लबले एक वटा क्लबले तीन जना राष्ट्रिय खेलाडी सहभागी गराउन पाउने छन् । 

प्रतियोगितामा प्रथम, द्वितीय, तृतीय र सान्त्वना हुने समूहले क्रमशः नगद दुई लाख, एक लाख, ५० हजार र ३० हजार रुपियाँसहित मेडल, ट्रफी र प्रमाणपत्र प्राप्त गर्ने आयोजकले जनाएको छ । साथै उत्कृष्ट खेलाडीलाई नगद १० हजार र अन्य पाँच वटा विधामा ५–५ हजार नगद पुरस्कारको व्यवस्था गरिएको छ । 

प्रतियोगिता सञ्चालनका लागि १७ देखि १८ लाख खर्च हुने अनुमान गरिएको आर्थिक संयोजक राजेन्द्र मल्लले बताउनुभयो । जिल्ला भलिबल सङ्घ, पाल्पाको समन्वय, रामपुर उद्योग वाणिज्य सङ्घ, रामपुर भलिबल सङ्घ र नगर खेलकुद विकास समितिको सहकार्यमा सञ्चालन हुने प्रतियोगिताको तयारी अन्तिम चरणमा पुगेको क्लबका पदाधिकारीको भनाइ छ ।