.jpg)
अनिल पराजुली
हेटौँडा, मङ्सिर १३ गते । हेटौँडा उपमहानगरपालिका–१९ बाट मनहरी गाउँपालिका–३ का बस्तीपुर र भुन्द्रङलाई जोड्ने १७० मिटर लामो राप्तीखोला पुल शनिबार उदघाटन गरिएको छ । बागमती प्रदेश भौतिक पूर्वाधार विकास मन्त्रालय अन्तर्गतको पूर्वाधार विकास कार्यालयले निर्माण गरेको उक्त पुल बागमती प्रदेशका मुख्यमन्त्री इन्द्रबहादुर बानियाँ, भौतिक पूर्वाधार विकासमन्त्री डा. दीनेशचन्द्र देवकोटा तथा १०३ वर्षीया स्थानीय वृद्धा सरस्वती अर्यालले संयुक्त रूपमा उदघाटन गर्नुभयो ।
उदघाटन समारोहमा मुख्यमन्त्री बानियाँले सङ्घीय व्यवस्थाले जनताको लागि धेरै काम गर्न थालेको चर्चा गर्नुभयो । निर्वाचन घोषणा भइसकेको अवस्थामा जनताले मन परेका पार्टी र उम्मेदवारलाई स्वतन्त्र रूपमा मत दिन सक्ने अवसर लोकतन्त्रको सबैभन्दा ठुलो उपलब्धि भएको बताउनुभयो ।
मुख्यमन्त्री बानियाँले भ्रम फैलाउने तथा गलत काम गर्ने प्रवृत्तिलाई अब नेपालले धेरै समय सहन नसक्ने स्पष्ट पार्नुभयो । राणा शासनदेखि सुरु भएको राजनीतिक यात्राले सङ्घीय लोकतान्त्रिक गणतन्त्रसम्म आइपुग्दा अबको आवश्यकता सुधार र परिमार्जन मात्र रहेको बताउनुभयो । यस क्रममा उहाँले जनप्रतिनिधिको सङ्ख्या तथा पालिकाको सङ्ख्या समायोजन गर्ने प्रस्ताव पनि प्रस्तुत गर्नुभयो ।
उहाँले समग्र विकाससँगै जनताको जीवनस्तर उकास्न रोजगारीमुखी कार्यक्रम आवश्यक रहेको उल्लेख गर्दै कृषिजन्य उत्पादनलाई सीप, तालिम र प्रविधिसँग जोड्न स्थानीय तहलाई आग्रह गर्नुभयो । गाउँघरमा बसोवास गर्ने युवायुवतीलाई सहलगानीमा रोजगारीमा जोड्न आगामी बजेटमार्फत प्रदेश सरकारले विशेष कार्यक्रम ल्याउने प्रतिबद्धता जनाउनुभयो ।
“बाटो बनेपछि सुविधा पुगेको छ, उत्पादन बजारसम्म लग्न सजिलो भएको छ, अब उत्पादनलाई आधुनिक बनाउँदै आय वृद्धिमा जनतालाई जोड्नु हाम्रो जिम्मेवारी हो” मुख्यमन्त्री बानियाँले भन्नुभयो ।
राप्तीखोला पुल निर्माणका लागि लागत अनुमान ३२ करोड १२ लाख ३७ हजार २६९ रुपियाँ रहेकोमा मूल्य अभिवृद्धि कर र कन्टिन्जेन्सीसहित २९ करोड ५९ लाख ३८ हजार ५ सय रुपियाँमा निर्माण सम्झौता भएको थियो । काठमाण्डौँको हिराचन कन्स्ट्रक्सन कम्पनी प्रालिले २०८० साल वैशाख ११ गते सम्झौता गरी २०८३ वैशाख १० गतेभित्र निर्माण सम्पन्न गर्नुपर्ने भए पनि निर्धारित समयभन्दा अघि नै पुल निर्माण सम्पन्न भएको हो ।
