मुक्तिनाथ (मुस्ताङ), मङ्सिर १३ गते । मुस्ताङको घरपझोङ गाउँपालिका—४, जोमसोमको एक रेस्टुरेन्टबाट प्रहरीले १२ जना जुवाडेलाई नगदसहित पक्राउ गरेको छ । जुवा खेलिरहेको सूचनाको आधारमा जिल्ला प्रहरी कार्यालय मुस्ताङबाट खटिएकोटोलीले ईन क्याफे एन्ड रेस्टुरेन्टबाट एक लाख २१ हजार ६४० रुपियाँ नगदसहित १२ जना जुवाडे शुक्रबार साँझ पक्राउ गरेको हो । स्थानीय गणेश शेरचनले सञ्चालन गरेको रेस्टुरेन्टमा जुवातास खेल्ने गरेको गुनासोपछि जुवाडेलाई पक्राउ गरी आवश्यक अनुसन्धान प्रक्रिया अघि बढाइएको प्रहरी निरीक्षक प्रहरी निरीक्षक सन्तोष बस्यालले बताउनुभयो ।
सूचना अधिकारी एवम् प्रहरी निरीक्षक बस्यालका अनुसार पक्राउ पर्नेमा क्याफे एन्ड रेस्टुरेन्टका सञ्चालक गणेश शेरचन, सुनिल कुमार शेरचन, सञ्जय थकाली, ढिङडुक गुरुङ, सन्तबहादुर मजाकोटी, महेश थकाली, फलेन्द्रप्रसाद थकाली, रविकुमार थकाली, राजेन्द्र शेरचन, श्यामराज बराल, आङपासाङ शेर्पा, सदिप राना रहेका छन् । पक्राउ पर्नेलाई जिल्ला प्रहरी कार्यालयको हिरासत कक्षमा राखिएको छ ।
मुस्ताङमा पर्यटक बनेर जाने तथा त्यहाँ कार्यरत कर्मचारीसहित स्थानीय समेत जुवामा संलग्न रहेको सूचनाको आधारमा प्रहरीले निगरानी बढाएको थियो । यसैबिच पक्राउ परेकाहरूबाट थप सूचना समेत लिएर निगरानी बढाउने प्रहरीले जनाएको छ ।
जिल्लाभित्र जुवातास लगायतका गैरकानुनी काम गरेको पाइएमा सूचना दिन प्रहरीले अनुरोध गरोको छ । मुलुकी अपराध संहिता, २०७४ ले जुवा खेल्न वा सट्टाबाजी गर्न नहुने दफाअन्तर्गत पहिलो पटक जुवा खेल्ने वा खेलाउनेलाई तीन महिनासम्म कैद वा ३० हजारसम्म जरिवाना गर्ने कानुनी व्यवस्था रहेको छ ।
