चरीकोट,मङ्सिर १३ गते । नेकपा एमाले दोलखाले पार्टीको ११ औं महाधिवेशनका लागि प्रतिनिधि सर्वसम्मत चयन गरेको छ । एमाले दोलखाले शनिबार पत्रकार सम्मेलन गर्दै सर्वसम्मत प्रतिनिधि चयन गरिएको जनाएको हो ।
महाधिवेशन प्रतिनिधिहरुमा खुला तर्फ नरबहादुर श्रेष्ठ, भरतबहादुर केसी, इश्वर पोखरेल र डबल पाण्डे प्रतिनिधि चयन भएका छन् । महिलातर्फ शान्ति कुमारी तामाङ, उर्मिला थामी र शारदा राणा छनोट भएका छन् ।
त्यसैगरी, दलित तर्फबाट विशाल विक र युवातर्फ लक्ष्मण गुभाजु महाधिवेशन प्रतिनिधिमा चयन गरिएको एमाले दोलखाका अध्यक्ष नर बहादुर श्रेष्ठले बताउनुभयो ।
जिल्लाबाट जम्मा नौ जना प्रतिनिधि सर्वसम्मत रूपमा चयन गरिएको उहाँले बताउनुभयो । एमालेको ११ औं राष्ट्रिय महाधिवेशन आगामी मङ्सिर २७ देखि २९ गतेसम्म काठमाडौँमा तय गरिएको छ ।
