तिलाचन पाण्डे
तम्घास (गुल्मी), मङ्सिर १३ गते । गुल्मीमा एक हप्ताको समय अवधिमा १५१ जनाले राहदानी बनाउँदा सात लाखभन्दा बढी राजस्व सङ्कलन भएको छ ।
जिल्ला प्रशासन कार्यालय गुल्मीका सहायक प्रमुख जिल्ला अधिकारी हरिप्रसाद गैरेका अनुसार गत आइतबारदेखि शुक्रबारसम्म १५१ जनाले राहदानीका बनाउँदा सात लाख ७५ हजार रुपियाँ राजस्व सङ्कलन भएको हो ।
यस्तै एक हप्ताको समय अवधिमा जिल्ला प्रशासन कार्यालयबाट नयाँ नागरिकता १९७, प्रतिलिपि १२९, गैरआवसीय नागरिकता एक, नाबलक परिचयपत्र १८, राहदानीको आवेदन संकलन १५१, राहदानी वितरण २२, राष्ट्रिय परिचयपत्रको आवेदन सङ्कलन ४७८, राष्ट्रिय परिचयपत्र वितरण २८७, दलित, जनजाती, पारिवारिक विवरण तथा अन्य प्रमाणित ३३ भएको छ ।
यस्तै छ वटा संस्था दर्ता तथा नवीकरणबाट आठ हजार ३५०, राष्ट्रिय परिचयपत्रबाट दस हजार गरी कुल सात लाख ९३ हजार ३५० रुपियाँ राजस्व सङ्कलन भएको हो ।
