सहदेव बस्नेत
जाजरकोट, मङ्सिर १३ गते । जाजरकोटका महिलाहरु पञ्चेबाजा बजाएर आफ्नो संस्कृति संरक्षणमा जुटेका छन् । विगतमा पुरुषहरुले मात्रै पञ्चेबाजा बजाउने यस जिल्लामा हाल महिलाहरु हरेक विवाह, महोत्सव, दिवसीय कार्यक्रम, उत्सव लगायतमा सहभागि हुने गरेका छन् ।
जसले गर्दा महिलाहरुलाई केही मात्रामा भए पनि आयआर्जन पनि हुने र पञ्चेबाजाको संस्कृति संरक्षण भइरहेको छ । पञ्चेबाजा संरक्षण समूहकम सदस्य लक्ष्मी केसीले एक कार्यक्रममा अवस्था हेरे १० देखि १५ हजार रुपियाँसम्म लिने गरेको बताउनुहुन्छ । यसले महिलाहरुमा आत्मानिर्भरता तर्फ समेत अग्रसर बनाएको केसीको भनाइ छ ।
पुरुषहरुले बाजा बजाएको मात्र देखेकी कुशे गाँउपालिका ६ कि गंगा परियार अहिले पञ्चेबाजा बजाउने भएपछि आफैँ दंग पर्नु भएको छ । गाँउघरमा मेला, जात्रा, उत्सब, चाडवाड, विहेवारी लगायतका कार्यमा पुरुषहरुले बाजा बजाएको देख्नभएको गंगा अहिले आफैँ बजाउने गर्नुभएको छ ।
हाल महिलाहरुले दमाहा(नगरा), छिल्लर (झ्याली), ट्याम्को, नरसिंहा, र सहनाई पाँच वटै बाजा बजाउन थालेपछि अन्य महिलाहरुमा पनि उत्साह थपेको छ । सम्पदा संरक्षण मञ्च जाजरकोटका अध्यक्ष जनक केसीले महिलाहरुले पञ्चे बाजा संरक्षण मा ठुलो टेवा पर्याएको बताउनुहुन्छ ।
सामाजिक विकास कार्यालय जाजरकोटको सहयोगमा जाजरकोट सम्पदा संरक्षण प्रतिष्ठानले महिलाहरुका लागि पञ्चेबाजा बजाउने तालिम दिएपछि यतिवेला जाजरकोटका गंगा जस्तै २० जना महिलाहरु पञ्चेबाजा बजाउन लागिपरेका छन् ।
