तिम्रो अन्तिम इच्छा के छ ?
कुमारजीले सोधेछन्
सुली चढ्दै गरेको
मान्छेलाई
खान बाँकी कुनै मिठो कुरा
लागाउन बाँकी कुनै रहर
आमाबुवासँग अन्तिम आशीर्वाद
भगवान्को अन्तिम पूजा प्रार्थना
चढ्न बाँकी कुनै साधन
पढ्न बाँकी कुनै किताब
प्रियतमासँग अन्तिम चुम्बन
सन्तानलाई स्नेहले लपेट्न
पिउन बाँकी कुनै...
लेख्न बाँकी कुनै...
हेर्न बाँकी कुनै दृश्य
खेल्न बाँकी...
रुन बाँकी...
हाँस्न बाँकी...
कुनै एउटा
फगत एउटा इच्छा
बताउन बारम्बार
गरेछन् कर
कुमारजीले
असीम मौनता भङ्ग गर्दै
अन्त्यमा
भने छन्–
सामाजिक सञ्जाल
चलाउन पाऊँ प्रभु
वाक् स्वतन्त्रताभन्दा
ठुलो कुरा के होला
आजको युगलाई ।
