शालिग्राम नेपाल
चितवन, मङ्सिर १३ गते । ठेक्का लागेको आठ वर्षमा पनि निर्माण पूरा नगरेपछि माडीको पतरीखोलाको पुलको ठेक्का सम्झौता तोडिएको छ । भरतपुर, माडी, ठोरी सडकखण्डको पतरीखोलामा पुल निर्माण गर्न २०७४ सालमा लोहनी एन्ड ब्रदर्स प्रालिसँग ठेक्का सम्झौता भएको थियो । ठेक्का भएको आठ वर्षमा पनि निर्माण नगरेपछि सम्झौता तोड्नु परेको हुलाकी राजमार्ग निर्देशनालयको योजना कार्यालय वीरगन्जका सूचना अधिकारी धर्मेन्द्रकुमार दासले जानकारी दिनुभयो । भरतपुरबाट माडी हुँदै ठोरी निस्केर वीरगन्ज पुग्ने यो राजमार्ग छोटो दुरीको छ ।
सूचना अधिकारी दासका अनुसार धेरै पटक ताकिता गर्दा पनि अटेर गरेको सूचना प्रकाशित गरी सम्पर्कमा आउन ठेकेदारलाई अनुरोध गर्दासमेत झन् अटेर गरेपछि सम्झौता तोडिएको हो । ठेकेदारलाई सम्झौता अनुसारको ठेक्का किन नतोड्ने भनेर १५ दिनभित्र स्पष्टीकरण माग गरिएको थियो ।
सो अवधिमा स्पष्टीकरण नबुझाएको, काम सुरु नगरेको र ठेकेदारका प्रतिनिधि पनि सम्पर्कमा नआएकाले ठेक्का तोड्नु परेको सूचना अधिकारी दासले जानकारी दिनुभयो । अलपत्र छाडेको पुलको म्याद तीन पटकसम्म थप भएको छ । ३८ करोड ४२ लाख पाँच हजार ४६१ रुपियाँ लागतमा ठेक्का लागेको थियो । यसको निर्माण प्रगति २९ प्रतिशत छ भने वित्तीय प्रगति २८.९५ प्रतिशत रहेको कार्यालयले जानकारी दिएको छ । माडीको भरतपुरतर्फ वनकट्टादेखि ठोरी जाने जङ्गलसम्म एक दर्जनभन्दा धेरै स्थानमा पुल निर्माण भएर यातायात सञ्चालनमा आइसकेको छ तर माडी नगरपालिका–७ मा रहेको पतरीखोलाको पुल निर्माण भएको छैन । जमिनमुनिको भाग मात्र काम गरेर त्यसै छोडेपछि निर्माण गर्न दबाब दिन नगरप्रमुख ताराकुमारी काजी महतोले सम्बन्धित निकायमा पहल गर्नुभएको थियो । माडीबाट ठोरी जाने र आउने सवारीसाधनलाई बर्खाको समयमा यहाँ वारपार गर्न कठिन पर्ने गरेको छ । बाढीले घन्टाँै रोकिँदा बिरामीलाई अस्पताल लैजान नसकेको घटना धेरै भएको नगरप्रमुख महतोले बताउनुभयो ।
पुल निर्माणको ठेक्का लोहनी एन्ड ब्रदर्स प्रालि भरतपुरले पाएको थियो । ठेक्का तोडिएकाले अब सार्वजनिक खरिद ऐन, २०६३ को दफा ५९ (८) बमोजिम कार्यसम्पादन जमानत जफत गर्ने तयारी भएको सूचना अधिकारी दासले बताउनुभयो । बाँकी काम पूरा गर्न आवश्यक पर्ने रकम सरकारी बाँकी सरह असुलउपर गर्ने र निर्माण कम्पनीलाई कालो सूचीमा राख्न सिफारिस गरिने भएको छ । अहिलेसम्म अद्यावधिक काम र बाँकी कामको नापजाँच तथा मूल्याङ्कन गरी वित्तीय फरफारक गर्न १५ दिनभित्र उपस्थित हुन पनि भनिएको छ । यसअगाडि डिभिजन सडक कार्यालय भरतपुरले काम नगर्ने ठेकेदारलाई कारबाही गर्न सूचना निकालेपछि तीन वटा कम्पनी पुनः काम गर्न तयार भएका थिए ।
डिभिजन सडक कार्यालय भरतपुरका प्रमुख नारायण लामिछानेले बिचैमा काम छाडेर गएको निर्माण कम्पनीले निवेदन दिएर काम गर्न इच्छा जनाएपछि विगतमा अलपत्र परेको निर्माणको काम सुरु भएको जानकारी दिनुभयो । पाँच वटा योजना पूरा नभएको भन्दै कार्यालयले कारबाहीका लागि सूचना प्रकाशित गरेको थियो ।
