पत्ता लाग्यो मानसरोवर कैलाशको दूरदर्शन गर्ने ठाउँ

हुम्ला समाचारदाता

हुम्ला, मङ्सिर १३ गते । नाम्खा गाउँपालिका–५ र ६ को सिमाना रहेको न्यालुलेकबाट मानसरोवर कैलाशको दूरदर्शन गर्न सकिने स्थान पत्ता लागेको छ । यसअघि पत्ता नलागेको सो स्थान नाम्खा गाउँपालिका–१ निवासी नाम्ग्याल तामाङले सो स्थान अग्लो भएका कारण देख्न सकिने पत्ता लागेको हो ।

होटेल व्यवसायीसमेत रहनुभएका तामाङले तीन जना भारतीय पर्यटक लाप्चाबाट मानसरोवर कैलाशको दूरदर्शन गर्न जाने गरी आएको र आफूलाई पनि सँगै जान आग्रह गर्दा मानसरोवर कैलाश दूरदर्शन गर्न सकिने नयाँ स्थान पत्ता लागेको बताउनुभयो । यसअघि सो स्थानबाट मानसरोवर कैलाश दूरदर्शन गर्न सकिने कुरा पत्ता लागेको थिएन । खासमा न्यालुलेकमा हिमपातका कारण लाप्चा जान नपाएपछि आफूले कतै न्यालुकै अग्लो स्थानबाट पनि देख्न सकिन्छ भनि खोज्दै जाँदा साढे दुई घण्टापछि सो स्थान पत्ता लागेको र भारतीय पर्यटकलाई सोही स्थानबाट दूरदर्शन गराएको उहाँले बताउनुभयो ।

कैलाश दूरदर्शन गर्न सकिने स्थान हालको पाँच हजार मिटर उचाइमा निर्माण गरिएको सडकबाट एक घण्टा पैदल हिँडेर पुगिन्छ । भारतीयसँग जाँदा पाँच हजार एक मिटर उचाइको न्यालुलेकबाट मानसरोवर कैलाश दूरदर्शन गर्न सकिने स्थान पत्ता लागेपछि सिमकोट आइपुगे लगत्तै विराटनगरबाट सिमकोट आइपुगेको दुई जनालाई पनि उहाँले सो स्थानमा पु¥याउनुभएको थियो । उहाँले अब लाप्चा नगएरै पनि न्यालुलेकबाट मानसरोवर कैलाश दूरदर्शन गर्न सकिने बताउनुभयो । अब मानसरोवर कैलाश दूरदर्शन गर्न सकिने स्थानसम्म घोडेटो बाटो निर्माण, सम्भव भए भ्यु टावर, खानेपानी, सूचनाको पहुँच जस्ता आवश्यक भौतिक पूर्वाधारको विकास गर्न आवश्यक रहेको उहाँले बताउनुभयो ।

गोरखापत्र अनलाइन