गोरखापत्र समाचारदाता
काठमाडौँ, मङ्सिर १३ गते । ऊर्जा, जलस्रोत तथा सिँचाइ; भौतिक पूर्वाधार तथा यातायात र सहरी विकास गरी तीन मन्त्रालय समालिरहेका मन्त्री कुलमान घिसिङले सरकारको पहिलो प्राथमिकता चुनाव गराउनु रहे पनि अन्य कामसमेत तीव्र रूपमा भइरहेको बताउनुभएको छ । शुक्रबार एक कार्यक्रममा उहाँले प्रभावकारी सेवा प्रवाह, विपत्प्रभावित क्षेत्रको पुनस्र्थापना एवं छिटोभन्दा छिटो पुनर्निर्माण सम्पन्न गर्न बजेट विनियोजन गरी काम भइरहेको बताउनुभएको हो ।
गत वर्षको असोजमा अविरल वर्षासँगै आएको बाढीपहिरोले क्षति पु¥याएको काभ्रेपलाञ्चोकको रोसी गाउँपालिका र नमोबुद्ध नगरपालिकाका विभिन्न वडाको स्थलगत निरीक्षण गर्ने क्रममा उहाँले त्यस्तो बताउनुभएको उहाँको सचिवालयले जनाएको छ । उहाँले रोसी नदीले क्षति पुगेका संरचनाको पुनर्निर्माणलाई प्राथमिकतामा राखी काम अगाडि बढाइने बताउनुभयो । बाढीका कारण त्यस क्षेत्रका सडक, पुल, खानेपानी, स्वास्थ्य चौकीलगायतका भौतिक संरचनामा क्षति पुगेको तर पुनर्निर्माण हुन नसकेको गुनासो आएपछि मन्त्री घिसिङ सडक विभागका महानिर्देशक, स्थानीय पूर्वाधार विकास विभागका महानिर्देशक, सिँचाइ डिभिजनका प्रमुखलगायतको टोलीसहित निरीक्षणमा जानुभएको हो ।
भौतिक पूर्वाधार तथा यातायात मन्त्रालयले सो कार्य अगाडि बढाउन अर्थ मन्त्रालयमा बजेट प्रस्ताव सहमतिका लागि पठाइसकेको जानकारी दिनुभयो । सो ठाउँमा बाढीले झोलुङ्गे पुल बगाएको थियो । पुल नहुँदा बर्सातमा त्यस क्षेत्रको आवतजावत अवरुद्ध हुने गरेको छ । बाढीले १० शøयाको आधारभूत अस्पताल पूर्ण रूपमा बगाएको थियो । गत वर्षको १०, ११ र १२ गतेको अविरल वर्षासँगै आएको बाढीपहिरोले रोशी गाउँपालिका–१, २ र ३ र नमोबुद्ध गाउँपालिका–८ र ९ तथा महाभारत र खानीखोला गाउँपालिका जोड्ने फलामे साँघुको पक्की पुलको दायाँबायाँको सडकमा क्षति पु¥याएको थियो । त्यस क्षेत्र नदी किनार संरक्षण नगरेमा पुल नै बगाउन सक्ने सम्भावना छ ।
नमोबुद्ध नगरपालिकाका प्रमुख कुन्साङ लामाले सङ्घीय र प्रदेश सरकारले विपत् प्रभावित संरचनाको पुनर्निर्माणमा बजेट अभाव हुन नदिने बताए पनि सोबमोजिम काम हुन नसकेको उल्लेख गर्नुभयो ।
तोडियो कनकाई पुलको ठेक्का
हुलाकी राजमार्ग अन्तर्गत १४ वर्षदेखि अलपत्र पारिएको झापा गाउँपालिका–२ र गौरीगन्ज गाउँपालिका–१ जोड्ने करिब ७२३ मिटर लम्बाइ भएको कनकाई पुल निर्माणको ठेक्का तोडिएको छ ।
सडक विभागमातहतको हुलाकी राजमार्ग निर्देशनालय अन्तर्गत योजना कार्यालय इटहरीले बिहीबार पुल निर्माणका लागि पप्पु महादेव खिम्तीको संयुक्त उपक्रम (जेभी) सँग ठेक्का सम्झौता अन्त्य गरेको भौतिक पूर्वाधार तथा यातायातमन्त्री कुलमान घिसिङको सचिवालयले जनाएको छ । ठेक्का सम्झौता रद्द गरिएको निर्माण व्यवसायीको एक करोड ७१ लाख रुपियाँ कार्यसम्पादन जमानत पनि जफत हुने छ । योजना कार्यालय इटहरीबाट असोज ३१ गते कात्तिकमा ठेक्का किन नतोड्ने ? भन्दै निर्माण व्यवसायीलाई १५ दिने स्पष्टीकरण सोधिएको थियो । निर्माण व्यवसायीबाट पेस भएको स्पष्टीकरण चित्तबुझ्दो नभएकाले सार्वजनिक खरिद कानुनमा भएको व्यवस्थाबमोजिम ठेक्का रद्द गरिएको योजना कार्यालयका प्रमुख युवराज पोखरेलले जानकारी दिनुभयो ।
झापा गाउँपालिकाका कार्यवाहक अध्यक्ष अञ्जुदेवी थपलियाले कनकाई पुल निर्माण नहुँदा सर्वसाधारणले ठुलो सास्ती भोग्दै आएको गोरखापत्रसँग बताउनुभयो । उहाँले भन्नुभयो, “हरेक साल बाँसको पुल बनाइन्छ, बाढीले बगाएर लान्छ । यो पुल निर्माण नहुँदा शिवगन्ज, महाभरा, गौरीगन्ज, रङ्गेली र विराटनगरसम्म यात्रा गर्ने व्यक्तिले अहिलेसम्म दुःख भोग्दै आएका छन् ।” सो पक्की पुल डिजाइन एन्ड बिल्ड ढाँचामा निर्माणका लागि पप्पु महादेव खिम्ती उपक्रम (जेभी) सँग २०६८ जेठ ३१ गते ठेक्का सम्झौता भएको थियो । पुल निर्माण २०७२ जेठ ३० गतेभित्र सम्पन्न गरी ठेक्का सम्झौता भएकोमा पाँच पटक म्याद थप्दा निर्माण प्रगति करिब ५६ प्रतिशत मात्र छ ।
