गोरखापत्र समाचारदाता
काठमाडौँ, मङ्सिर १३ गते । प्रधानमन्त्री सुशीला कार्कीले आगामी फागुन २१ गतेका लागि तय भएको प्रतिनिधि सभा सदस्यका लागि हुने निर्वाचन स्वतन्त्र, निष्पक्ष र भयरहित वातावरणमा सम्पन्न गर्ने गरी आवश्यक सम्पूर्ण सुरक्षा व्यवस्था चुस्त बनाउन नेपाली सेनालाई निर्देशन दिनुभएको छ ।
सरकारको सिफारिसमा नेपाली सेनाका परमाधिपतिसमेत रहनुभएका राष्ट्रपति रामचन्द्र पौडेलले बिहीबार सेना परिचालन गर्न स्वीकृति प्रदान गर्नुभएको थियो । प्रधानमन्त्री सुशीला कार्कीले शुक्रबार नेपाली सेनाको मुख्यालय जङ्गी अड्डाको निरीक्षण भ्रमण गरी आगामी निर्वाचन सुरक्षा तयारीबारे सैनिक नेतृत्वसँग जानकारी लिनुभएको थियो ।
यस क्रममा नेपाली सेनाले हालको सुरक्षा अवस्था, प्रमुख चुनौती र आगामी योजनाबारे ब्रिफिङ गरेको थियो । साथै निर्वाचन सुरक्षामा सेना परिचालनको योजना र ढाँचाबारे पनि प्रस्तुतीकरण गरिएको थियो । प्रधानमन्त्री कार्कीले आन्दोलनपश्चात् गठित सरकारलाई मुलुकमा शान्ति सुरक्षा बहाल गराई यही फागुन २१ गते प्रतिनिधि सभा सदस्य निर्वाचन सम्पन गर्ने राष्ट्रिय अभिभारा रहेको बताउँदै निर्वाचनलाई स्वतन्त्र, निष्पक्ष र भयरहित वातावरणमा सम्पन्न गर्न नेपाली सेनालाई प्राप्त जिम्मेवारी सफलतापूर्वक पूरा गरिने विश्वास पनि व्यक्त गर्नुभयो ।
निर्वाचनका सन्दर्भमा नेपाली सेनालाई निर्देशन दिँदै प्रधानमन्त्री कार्कीले भन्नुभयो, “मैले यसअघि पनि भन्दै आएको छु कि आगामी चुनावमा एक थोपा पनि रगत बग्नु हुँदैन र एक जना पनि घाइते हुनुहुँदैन ।” प्रधानमन्त्री कार्कीले यसअघिका चुनावको समेत अनुभव र आसन्न चुनावका विविध आयामबाट विश्लेषण गरी सुरक्षा संवेदनशीलताका आधारमा सबै सुरक्षा निकायसँगको समन्वयात्मक भूमिकामा र त्रुटिरहित ढङ्गले काम गर्नुपर्नेमा जोड दिनुभयो । उहाँले जनतालाई सुरक्षाको प्रत्याभूति दिन, प्रहरी कारबाहीलाई सहजीकरण, सहयोग र सुरक्षित गर्न तथा सबै राजनीतिक दलका राजनीतिक गतिविधिलाई बिनाअवरोध सञ्चालन गर्ने वातावरण सिर्जना गर्न स्पष्ट कार्ययोजनासहित अघि बढ्न पनि नेपाली सेनालाई निर्देशन दिनुभयो ।
प्रधानमन्त्री कार्कीले जेनजी आन्दोलनका क्रममा लुटिएका र हराएका हातहतियारको खोजी तथा नियन्त्रणमा लिन प्रहरीलगायत सुरक्षा निकायसँग सहकार्य गरी स्थिति सामान्य पार्ने र फरार अपराधी पक्रन प्रहरीलाई सहयोग गर्न पनि कुनै कसर बाँकी नराखी खटिन सेनालाई आग्रह गर्नुभयो । सो अवसरमा गृहमन्त्री ओमप्रकाश अर्याल, कानुनमन्त्री अनिलकुमार सिन्हा, मुख्य सचिव सुमनराज अर्याल, प्रधान सेनापति अशोकराज सिग्देललगायतको उपस्थिति थियो ।
सरकार र जेनजीबिच सम्झौता हुने
यसैबिच सरकार र जेनजी संयुक्त जनआन्दोलनका अभियन्ताबिच सम्झौतापत्रमा हस्ताक्षर हुने भएको छ । प्रधानमन्त्री सुशीला कार्कीले सरकार र जेनजी अभियन्ताबिचको सम्झौताको मसौदा तयार पार्न सोमबारसम्मको समयसीमा दिनुभएपछि आन्दोलन संस्थागत गर्न समझदारीपत्रमा हस्ताक्षर हुने निश्चित भएको हो ।
प्रधानमन्त्री कार्की र जेनजी अभियन्ताबिच शुक्रबार सिंहदरबारमा भएको बैठकपछि सम्झौतापत्रको मसौदा बनाउन गृहकार्य सुरु भएको हो । शुक्रबारबाटै काम सुरु गरेर आइतबार दुवै पक्ष बसेर टुङ्ग्याउने गरी काम सुरु भएको छ ।
प्रधानमन्त्री कार्कीले जेनजी र सरकारबिच हुने सम्झौतापत्रको काम चाँडो टुङ्ग्याउन निर्देशन दिनुभयो । उहाँले भन्नुभयो, “अब यो विषय धेरै लम्ब्याउनु हुँदैन । शनिबारसमेत काम गर्नुहोस् । आइतबार दिनभर लागे लागोस्, जे जे हेर्नु पर्छ, हेर्नु पर्छ, हेर्नुहोस् । सोमबारभित्रमा अन्तिम रूप दिइएको हुनु पर्छ ।” उहाँले भन्नुभयो, “हस्ताक्षर गरेकै कारणले केही बेहोर्नुपरे म बेहोरौँला । मेरो सिङ्गो मन्त्रीपरिषद्ले त्यसको जिम्मेवारी लिन्छ । यो राजनीतिक दस्ताबेज हो । कर्मचारी प्रशासकले चिन्ता लिनु पर्दैन ।”
कात्तिक २८ गते जेनजी जनआन्दोलनको जनादेश सम्बन्धमाजनआन्दोलनकारी र राज्य पक्षबिच प्रस्तावित सम्झौतापत्र पेस गरिएको थियो । सम्झौतापत्रमा प्राप्त उपलब्धिको रक्षा गर्दै सम्झौतापत्रमा जेनजी जनआन्दोलनका क्रममा तत्कालीन सरकारले गरेको दमन, हिंसा र सुरक्षा संयन्त्रबाट मारिएका जनआन्दोलनकारी र सर्वसाधारणलाई सहिद घोषणाको प्रस्ताव गरिएको छ । बैठकमा गृहमन्त्री ओमप्रकाश अर्याल, युवा तथा खेलकुदमन्त्री बब्लु गुप्ता, मुख्य सचिव सुमनराज अर्याल, जेनजी अभियन्ताहरू रक्षा बम, मनीषा चौधरी, मोनिका निरौला, युजनराज भण्डारी, उपार्जुन चाम्लिङलगायत सहभागी हुनुहुन्थ्यो ।
अनावश्यक खर्च रोक्नुपर्ने
यसै गरी प्रधानमन्त्री सुशीला कार्कीले आगामी चुनावबाट असल प्रतिनिधि संसद्मा पठाउनुपर्ने धारणा राख्नुभएको छ । नेपाल परिवार दलको प्रतिनिधिमण्डलसँग शुक्रबार प्रधानमन्त्री तथा मन्त्रीपरिषद् कार्यालयमा भएको भेटवार्ताका क्रममा उहाँले चुनावमा हुने अनावश्यक खर्च र अनुचित तवरले मतदाता प्रभावित पार्ने प्रवृत्ति रोक्नुपर्ने धारणा राख्नुभएको हो ।
प्रधानमन्त्रीले भन्नुभएको छ, “तपाईंहरू चुनावको तयारीमा जुट्नुभएको छ । यो खुसीको कुरा हो । सँगसँगै यो चुनाव विगतभन्दा फरक हुनु पर्छ । कम खर्चमा हुनु पर्छ । प्रचारप्रसारमा तडकभडक हुनुहुँदैन । उम्मेदवारको पैसा खर्च नहुने गरी प्रचारको शैली परिवर्तन गर्नु पर्छ । अनि सदनमा पनि राम्रा मान्छे पुग्छन् ।” प्रतिनिधिमण्डलका तर्फबाट परिवार दलका अध्यक्ष एकनाथ ढकालले वर्तमान सरकार गठन भएपछि तत्कालै आफ्नो पार्टीले स्वागत गरेको र गुणदोषका आधारमा आलोचना वा समर्थन गर्ने बताउनुभयो ।
