क्वाललाम्पुर, मङ्सिर १२ गते । मलेसियामा भीषण वर्षा र बाढीका कारण देशभर व्यापक प्रभाव परेको छ । मलक्का राज्यमा ११ वर्षका एक बालक बाढीको पानीमा बगेर मृत्यु भएको पुष्टि भएको छ । उद्धारकर्मीले बालकलाई अन्तिम पटक देखिएको स्थानबाट करिब ६०० मिटर टाढा मृत फेला पारेका हुन् ।
देशभरका विभिन्न क्षेत्रमा बाढीले जनजीवन प्रभावित गरेको छ । सामाजिक कल्याण विभागका अनुसार, हालसम्म २६ हजार ९२८ भन्दा बढी मानिस आफ्नो घरबार छोडेर सुरक्षित स्थानमा विस्थापित भएका छन् । विस्थापितलाई २७३ राहत केन्द्रमा आश्रय दिइएको छ । तीमध्ये सबैभन्दा बढी प्रभावित क्षेत्र कलान्तान राज्य रहेको छ, जहाँ दर्जनौं गाउँ पानीमुनि डुबेका छन् र यातायात प्रणाली पनि ठप्प छ ।
स्थानीय अधिकारीले उद्धारकार्य तीव्ररुपमा सञ्चालन गरिरहेका छन् । बाढीले करिब सडक र पुल क्षतिग्रस्त बनाएपछि केही क्षेत्रसम्म पुग्न उद्धारकर्मीलाई कठिनाइ भइरहेको छ । स्थानीय प्रशासनले प्रभावितलाई सुरक्षित स्थानमा सार्ने र राहत सामग्री उपलब्ध गराउने काम गरिरहेको छ ।
यसैबीच, मौसम विभागले चेतावनी जारी गर्दै बाढीको स्थिति अझ बिग्रन सक्ने बताएका छन् । मलक्का जलसन्धिबाट भित्रिँदै गरेको उष्णकटिबन्धीय आँधी ‘सेन्यार’ले लगातार वर्षा र तेज हावा ल्याइरहेको छ । विभागले नागरिकलाई सतर्क रहन, उच्च जोखिम भएका क्षेत्रबाट टाढा रहन र स्थानीय प्रशासनको निर्देशन पालन गर्न आग्रह गरेको छ ।
विशेषज्ञले बाढी र आँधीको जोखिम अझ बढ्ने चेतावनी दिएका छन् । उनीहरूले यस परिस्थितिमा जनजीवन र सम्पत्तिको सुरक्षा अत्यन्त महत्वपूर्ण रहेको बताउँदै, राहत र उद्धार अभियानलाई प्राथमिकता दिन आग्रह गरेका छन् । मलेसियामा लगातार वर्षा र आँधीको यो स्थिति केही दिनसम्म रहन सक्ने अनुमान गरिएको छ, जसले थप विस्थापन र क्षति निम्त्याउन सक्छ । रासस/सिन्ह्वा
