गोरखापत्र अनलाइन
काठमाडौँ, कात्तिक २५ गते । सशस्त्र प्रहरी बल, नेपालका महानिरीक्षक राजु अर्याल भारतको सशस्त्र सीमा बल (एसएसबी) सँग हुने नवौँ समन्वयात्मक बैठकमा भाग लिन सोमबार भारत प्रस्थान गर्नुभएको छ।
त्रिभुवन अन्तर्राष्ट्रिय विमान स्थलमा उहाँलाई सशस्त्र प्रहरीका अतिरिक्त महानिरीक्षक नारायणदत्त पौडेलसहित वरिष्ठ अधिकृतहरूले हार्दिक बिदाइ गरेका गर्नुभयो ।
महानिरीक्षक अर्यालसँगै सीमा सुरक्षा विभाग प्रमुख गणेशबहादुर ठाडा मगर, प्रहरी नायब महानिरीक्षक दीपक रेग्मी, राष्ट्रिय अनुसन्धान विभागका अनुसन्धान निर्देशक रामप्रसाद दास, सशस्त्र प्रहरी वरिष्ठ उपरीक्षक किरण बस्नेत, गृहमन्त्रालयका उपसचिव रविन्द्र आचार्य, परराष्ट्र मन्त्रालयका उपसचिव विजयराज तण्डुकार र सशस्त्र प्रहरी नायब उपरीक्षक सुरज पौडेल पनि त्यसतर्फ प्रस्थान गर्नुभएको छ।
समन्वयात्मक बैठक भारतको नयाँ दिल्लीमा कात्तिक २६ देखि २८ गतेसम्म आयोजना हुने छ।
बैठकमा सीमा अपराध नियन्त्रण, लागुऔषध ओसारपसार नियन्त्रण, अवैध चोरी–निकासी तथा पैठारी नियन्त्रण, सूचना आदान–प्रदान र सीमा सुरक्षालाई अझ सुदृढ बनाउनका उपायबारे दुई देशका सुरक्षा निकायबिच विस्तृत छलफल हुने छ।
नेपाल–भारतबिच नियमित रूपमा हुँदै आएको यस किसिमको बैठकले दुवै देशबिचको सीमा क्षेत्रमा शान्ति, सुरक्षा, आपसी समन्वय र सहकार्य सुदृढ गर्न महत्त्वपूर्ण योगदान पुर्याउने विश्वास लिइएको छ।
सशस्त्र प्रहरी महानिरीक्षक अर्यालको अनुपस्थितिमा सशस्त्र प्रहरीका अतिरिक्त महानिरीक्षक नारायणदत्त पौडेलले निमित्त महानिरीक्षकको जिम्मेवारी सम्हाल्ने जानकारी सशस्त्र प्रहरी बलका सह–प्रवक्ता प्रहरी नायब उपरीक्षक शैलेन्द्र थापाले दिनुभयो ।
