राममणि दाहाल
मकवानपुर, कात्तिक १३ गते । पूर्वी मकवानपुरको बागमती गाउँपालिका –३ स्थित चिरुवाखोलामा पाँच करोड रुपियाँभन्दा बढीको लागतमा पक्की पुल निर्माण सुरु भएको छ ।
बागमती प्रदेश सरकारको लगानीमा बागमती गाउँपालिका –३ मा लखनखहरे–ज्ञानमन्दिर आधारभूत विद्यालय चिरुवा गढन जोड्नेगरी चिरुवा खोलामा निर्माण हुने भएको हो ।
पाँच करोड पाँच लाख ५३ हजार रुपियाँको लागतमा आगामी २०८३ असार ३० गतेसम्ममा निर्माण गर्नेगरी निर्माण कम्पनीसँग सम्झौता भएको उक्त पक्की पुलको लम्बाई ४० मिटर र चौडाई ८.४० मिटर रहेको छ ।
उक्त पुल निर्माणको बागमती प्रदेशसभा सदस्य प्रेमबहादुर पुलामीले एक कार्यक्रमका बिच शिलान्याश गर्दै पुल निर्माणपछि स्थानीयको आयआर्जनसँगै जीवनस्तर सुधारमा सहयोग पुग्ने बताउनुभयो ।
शिलान्याश कार्यक्रममा बागमती गाउँपालिकाका अध्यक्ष सर्केश घलान, प्रमुख प्रशासकीय अधिकृत ओमबहादुर दर्जी, वडा ३ का वडाध्यक्ष कमानसिं पाख्रिनलगायतको उपस्थिति रहेको थियो ।
वडाध्यक्ष पाख्रिनले पुल अभावमा स्थानीयले वर्षायाममा समस्या झेल्दै आएको बताउँदै पुल निर्माणपछि गाउँपालिका कार्यालय, जिल्ला सदरमुकाम र उपचारका लागि स्वास्थ्य संस्था स्थानीय बासिन्दालाई पुग्न सहज हुने बताउनुभयो ।
उहाँले चिरुवाखोलामा पक्की पुल निर्माणपछि पालिकाको विकट बस्तीको रुपमा रहेको चिरुवा गढनक्षेत्रका बासिन्दाले उत्पादन गर्ने कृषि तथा पशुजन्य उत्पादन बजारसम्म ल्याउन र स्थानीय आवतजावत गर्न सुविधा पुग्ने बताउनुभयो ।
