मेक्सिको सिटी, असोज २९ गते । संयुक्त राज्य अमेरिकाले नयाँ भन्सार शुल्क नीति लागू गरिरहेको सन्दर्भमा, मेक्सिको सरकारले देशको निर्यात व्यवसायमा नकारात्मक असर नपरोस् भन्ने उद्देश्यले सबैभन्दा अनुकूल व्यापार सर्त सुनिश्चित गर्न पहल थालेको छ ।
मङ्गलबार आयोजित व्यापार समन्वय परिषदको बैठकमा मेक्सिकोका अर्थमन्त्री मार्सेलो एब्रार्डले सो जानकारी दिनुभयो । उहाँले बताएअनुसार, सन् २०२६ मा हुने संयुक्त राज्य–मेक्सिको-क्यानाडा सम्झौताको पुनरावलोकनअघि नै दुई देशबीच रहेका व्यापारिक मतभेद समाधान गर्न वार्ता अघि बढाइएको छ ।
मन्त्री एब्रार्डले विशेष गरी अमेरिकी राष्ट्रपति डोनाल्ड ट्रम्पद्वारा घोषणा गरिएका नयाँ भन्सार शुल्कको असर कम गर्न मेक्सिकोले केही छुट योजना (रियायत) ल्याउने तयारी गरिरहेको जानकारी दिनुभयो, जसले मेक्सिकन निर्यातलाई प्रतिस्पर्धात्मक बनाउने अपेक्षा गरिएको छ । “हाम्रो मुख्य उद्देश्य भनेको मेक्सिकोका व्यापार सर्त अन्य देशहरूको तुलनामा अझ राम्रो बनाउनु हो,” उहाँले भन्नुभयो ।
उहाँले थप जानकारी दिँदै भन्नुभयो,“अमेरिकासँगको वार्ता सकारात्मक रूपमा अगाडि बढिरहेको छ र दुबै पक्षले पछिल्ला नीतिका कारण उत्पन्न खर्च तथा सम्भावित विवादको पहिचान गरिसकेका छन् ।” आगामी नोभेम्बरसम्ममा अधिकतम समस्या समाधान गर्ने लक्ष्य राखिएको पनि उहाँले स्पष्ट पार्नुभयो । रासस/सिन्ह्वा
