अमृतप्रसाद पौडेल
म्याग्दी, भदौ १३ गते । म्याग्दीको रघुगंगा गाउँपालिकाको चार वडा वडाका नौ सय एक जनालाई झण्डै पौने चार करोड रुपियाँ वितरण गरिएको छ । नेपाल रेडक्रस सोसाइटीको समन्वय तथा आइरिस रेडक्रस सोसाइटीको सहयोगमा भएको जीविकोपार्जन प्रवर्धन परियोजनाअन्तर्गत उक्त रकम वितरण गरिएको हो ।
नेपाल रेडक्रस सोसाइती म्याग्दी शाखा तथा नेपाल रेडक्रस सोसाइटी तथा आइरिस रेडक्रस सोसाइटीको आर्थिक सहयोगमा भएको उक्त कार्यक्रममा रघुगंगा गाउँपालिका २ का दुई सय ५८ जना, ३ वडाका दुई सय ४९ जना, ५ वडाका एक सय ५३ जना र ६ नम्बर वडाका दुई सय ४१ जना गरी कुल नौ सय एक जनालाई आर्थिक सहायता गरिएको थियो ।
नेपाल रेडक्रस सोसाइटी म्याग्दीका कार्यक्रम अधिकृत देवनारायण पौडेलले रघुगंगा गाउँपालिकाको चार वटा वडामा सञ्चालन भएको कार्यक्रमको बारेमा जानकारी गराउनु भएको थियो । उहाँका अनुसार २०२३ जुलाईदेखि सुरु भएको परियोजना २०२५ को अगष्टमा सकिएको र बिदाई गरिएको हो । उक्त अवधिमा ९०१ जनालाई तीन करोड ७२ लाख रुपियाँ नगद प्रदान गरिएको बिहीबार बेनीमा आयोजित कार्यक्रममा बताइएको थियो ।
बिहीबार बेनीमा सामुदायिक विकास विभाग, सामुदायिक जिविकोपार्जन प्रवर्धन परियोजना, बहिर्गमन तथा हस्तान्तरण कार्यशालाको आयोजना गरी नेपाल रेडक्रस सोसाइटी म्याग्दीले नेपाल रेडक्रस तथा आइरिस रेडक्रसलाई बिदाई गरेका थिए । कार्यक्रममा नेपाल रेडक्रस सोसाइटी केन्द्रीय समितिका निर्देशक पुजा कोइरालाले सामाजिक तथा सामुदायिक विकास विभागको बारेमा जानकारी गराउँदै कार्यक्रमको बारेमा पनि विस्तृत जानकारी दिनु भएको थियो ।
गाउँपालिकाले छनोट गरेका मध्ये किबि खेती गर्ने ८५ जनामध्ये ६७ जनाले ५५ हजारका दरले र १७ जनाले २० हजार दरले नगद प्राप्त गरेका थिए । त्यस्तै सुन्तला खेती गर्ने दुई सय १२ जनाले प्रतिव्यक्ति ३० वटा विरुवा र नगद २० हजार तथा सुन्तला खेतीका लागि काँटछाँट र गोडमेलका लागि आवश्यक पर्ने सामग्री प्राप्त गरेका थिए । गाउँपालिकाका चार वडा वडा भित्रका लक्षित वर्गका पाँच सय ७७ जनाले स्प्रे र हजारी पाएको नेपाल रेडक्र सोसाइटी म्याग्दीका कार्यक्रम अधिकृत पौडेलले बताउनुभयो ।
उहाँका अनुसार कागती खेती गर्ने ३१ जनाले ४० बिरुवा ३० हजार नगद प्राप्त गरे । त्यसैगरी ओखर खेती गर्ने ३५ जनाले १५ विरुवा २० हजार नगद, टिमुर खेती गर्ने ४० जनाले २० हजारका दरले नगद, सतुवाको खेती गर्ने १० जनाले २० हजारका दरले पाएका छन् । त्यसैगरी बेसारको खेती गर्ने ६० जनाले २० हजार, अदुवा खेती ३१ जनाले २० हजार, केरा ३५ जनाले २० हजारका दरले नगद प्राप्त गरेका थिए ।
त्यस्तै तरकारी खेती गर्ने टनेलका लागि १० जनाले ६५ हजारका दरले र १७ जनाले २० हजारका दरले नगद पाएको पौडेलको भनाइ छ । गाउँपालिकाको २, ३ र ५ र ६ नम्बर वडाका लाभग्राहीहरु मध्ये आरनको काम गर्ने ९ जनाले २० हजारका दरले नगद दिँदै गर्दा भैँसी र बाख्रा पालन गर्ने एक सय ८८ जनाले ३० हजारका दरले प्राप्त गरे । त्यसैगरी कुखुरा पालन गर्ने ८१ जनाले २० हजारका दरले र माहुरी पालन गर्ने ९० जनाले २ वटा घार सहितको माहुरी र नगद पाँच हजार पाएको कार्यक्रम अधिकृत पौडेलको भनाइ छ । होमस्टे व्यवसाय गर्ने २१ जनाले ४० हजारका दरले नगद प्राप्त गर्दै गर्दा बाँसको चोयाको काम गर्ने २४ जनाले २० हजारका दरले नगद पाएको र टेलरीङका १४ जनाले ४० हजारका दरले पाएका छन् ।
परियोजनाअन्तर्गत जलवायु अनुकूलन कृषि, पशुपालन, साना व्यवसाय-जीविकोपार्जन सहयोग, सिप मुलक व्यवसायिक तालिम, अपाङ्गता भएका व्यक्तिलाई सहयोग/सहयोगी सामग्री, वडा स्तरीय जलवायु अनुकुलन योजना निर्माण गरिएको थियो । त्यस्तै समुदाय स्तरीय जलवायु अभिमुखीकरण, सामुदायिक सरसफाई र गोरेटो बाटो स्तरोन्नती लगायतका काम भएको नेपाल रेडक्रस सोसाइटी म्याग्दी शाखाका सभापति अमरबहादुर बानियाँले बताउनुभयो । कार्यक्रमअन्तर्गत सङ्कटासन्न, गरिब घरधुरी, एकल महिला, अपाङ्गता भएका व्यक्ति र बेराजगार युवाहरुलाई समेटिएको थियो ।
