गोरखापत्र समाचारदाता
काठमाडौँ, भदौ १३ गते । चलचित्र ‘कोसेढुङ्गा’ बिहीबारदेखि देशव्यापी प्रदर्शनमा आएको छ । देशभर १०३ सोसहित फिल्म रिलिज भएको हो । सरोज पौडेलको निर्देशन रहेको चलचित्रको कथावस्तु महिलाप्रधान रहेको जनाइएको छ ।
चलचित्र देशको वर्तमान परिस्थिति, बेरोजगारीको समस्याले पिल्सिएको एउटा मध्यमवर्गको घरपरिवार कथामा आधारित रहेको छ । बेरोजगारीका कारणले जनताले कुन हदसम्म दुःख पाइरहेका छन् ? उनीहरूको सपना कसरी टुटिरहेको छ ? भन्ने विषयलाई पनि चलचित्रको कथामा देख्न पाइन्छ ।
चलचित्रमा सुरक्षा पन्त, नीति शाह, आर्यन सिग्देल, मञ्जिल कुमार, ऋचा शर्मा, प्रवीण खतिवडा, स्नेहा जोशी, हिउवाला गौतम, सरोज खनाल, विशाल पहाडी, दिनेश काफ्ले, लोकमणि सापकोटालगायतको अभिनय रहेको छ । नरदेवी फिल्म्सको प्रस्तुति रहेको चलचित्रका निर्मातामा प्रेविल कँडेल र किशोर अनुराग रहेका छन् भने कार्यकारी निर्माता भने दिनेश खड्का हुनुहुन्छ ।
