अवरुद्ध स्याफ्रुबेंसी रसुवागढी सडक मर्मत सुरु

गंगाकुमारी मिजार 

रसुवा, साउन ३० गते । नेपाल–चीनबिचको उत्तरी नाका रसुवागढीमा गत असार २४ गते ल्हेन्दे खोलामा आएको विनाशकारी बाढीले पूर्ण रुपमा क्षतिग्रस्त बनाएको मितेरी पुलको स्थानमा अस्थायी बेलब्रिज निर्माण कार्य चीनतर्फबाट सुरु गरिएको छ । 

चीन सरकारले पहिलो चरणमा आवत–जावत र व्यापार पुनः सञ्चालनका लागि पुल निर्माणको थालनी गरेको हो । गल्छी–त्रिशुली–मैलुङ–स्याफ्रुबेसी–रसुवागढी सडक आयोजनाको इन्जिनियर रुपनारायण पौडेलका अनुसार पक्की पुल निर्माणका लागि पुरानो स्थानबाट दुई मिटर पूर्वतर्फ सारेर ऐतिहासिक रसुवागढीको पुरातात्विक संरचना सुरक्षित राख्दै बेलिब्रिज निर्माण गरिँदैछ । 

चीनतर्फ सडक तथा भुइँ सतह मिलाउने काम पूरा भइसकेको छ । नेपालतर्फ स्थान निर्धारण सम्पन्र भएको छ । प्रमुख जिल्ला अधिकारी अर्जुन पौडेलका अनुसार बेलिब्रिज आगामी भदौ ३० गतेभित्र सम्पन्र हुने अपेक्षा छ, जसले स्थानीयवासी, व्यापारी र सीमापारका सेवाग्राहीहरुलाई राहत दिनेछ ।

त्यस्तै, असार १४ गते बुधबार बिहान भोटेकोशीमा आएको बाढीले अवरुद्ध बनाएको स्याफ्रुबेशी–रसुवागढी सडकको निर्माण तथा मर्मतको काम सुरु गरिएको छ । बाढीले घट्टेखोला, तातोपानी, कल्याङकुलुङ लिङलिङ लगायतका १८ स्थानमा बाढीले सडक कटान गरी क्षति गरेको छ । 

आयोजना इन्जिनियर पौडेलका अनुसार प्रारम्भिक चरणमा टिमरेको दुई स्थानमा सडक पुनः निर्माण सम्पन्र भइसकेको छ । तातोपानीतर्फ काम भइरहेको छ । सक्दो छिटो सडक मर्मत सम्पन्न गरी सडक दुईतर्फी सञ्चालनमा ल्याउने लक्ष्य रहेको उहाँले बताउनुभयो ।