चित्रकुमार मिजार
सिन्धुपाल्चोक, साउन ३० गते । असार २४ गते चीनतर्फको ल्हेन्दे खोलाको भीषण बाढीले केरुङमा अलपत्र नेपाली चालक, सहचालक, मजदुर, व्यापारी, व्यवसायी, व्यापारिक सङ्घ संस्थाका कर्मचारीलगायत ३ सय ७६ जना नेपालीलाई तातोपानी नाकाबाट उद्धार गरी काठमाडौं पठाइएको छ । रसुवा र केरुङ नाकास्थित मितेरी पुल बगाएपछि ठूलो सङ्ख्यामा नेपालीहरु केरुङमा अड्किएका थिए ।
केरुङमा अलपत्र नेपालीहरुलाई एक महिनासम्म चिनियाँ सुरक्षाकर्मीले खानबस्नको प्रबन्धसहित सुरक्षित रुपमा तातोपानी नाका ल्याइदिएपछि नेपालतर्फको जिल्ला प्रशासन कार्यालय सिन्धुपाल्चोकले साउन ७ गते २ सय ३ जना बुझेको छ । उनीहरुलाई तातोपानी ल्याउन सिन्धुपाल्चोक उद्योग वाणिज्य सङ्घले भूमिका खेलेको थियो । तातोपानीबाट उनीहरुलाई बाह्रबिसे नगरपालिकाले, पूर्व अरनिको यातयात सेवा समिति, काँग्रेसका युवा नेता सुवास तिमल्सिनाको पहलमा ७ वटा गाडीले राजधानी पुर्याएकाे थियो । भोटेकोशी गाउँपालिकाले खाना र स्वास्थ्य परीक्षण निःशुल्क गरेको थियो ।
चिनियाँ सुरक्षाकर्मीबाट नेपाल हिमालय सीमापार वाणिज्य सङ्घले १७३ जना अलपत्र नेपालीहरु बुझेको छ । सीमापार वाणिज्य सङ्घले चिनियाँ सुरक्षाकर्मीबाट अलपत्र नेपाली बुझेर उनीहरुलाई ५ वटा यात्रुवाहक बस र खानपानको निःशुल्क व्यवस्था गरेर राजधानीसम्म पुर्याएकाे सङ्घका अध्यक्ष रामहरि कार्कीले जानकारी दिनुभयो ।
सङ्घका प्रथम उपाध्यक्ष सुरेश श्रेष्ठ, उपाध्यक्ष सुजित बस्नेत, महासचिव रामचन्द्र पराजुली, सचिव आङदोर्जे शेर्पा, सुब्बा श्रेष्ठ, कोषाध्यक्ष सिद्धान्त बस्नेतलगायतका टोलीले अलपत्र नेपालीलाई राजधानीसम्म ल्याइदिएका थिए ।
केरुङबाट तातोपानी नाका ल्याइपुर्याइएका अलपत्र नेपालीहरुलाई जिल्ला प्रशासन कार्यालय सिन्धुपाल्चोक, जिल्लाका सुरक्षा निकाय, अध्यागमन कार्यालय तातोपानी, नेपाल हिमालय सीमापार वाणिज्य सङ्घलगायतका सरकारी निकाय, नाका आबद्ध व्यापारिक सङ्घसंस्थाले बुझेर उनीहरुलाई राजधानीसम्म पुर्याएकाे प्रमुख जिल्ला अधिकारी बन्धु बाँस्तोलाले बताउनुभयो ।
तातोपानी नाकाबाट उद्धार गरिएका नेपालीमध्ये कतिपय चिनियाँ भूभाग केरुङमा होटेल, पर्यटन जस्ता विभिन्न पेशा व्यवसाय गरेर बसेकाहरु पनि घर फर्केका छन् । रसुवा र केरुङस्तिथ मितेरी पुल बाढीले बगाएपछि नेपालीहरु घर फर्कन सीमापार वाणिज्य सङ्घलगायतका सङ्घसंस्था गुहारेपछि सङ्घले चिनियाँ अधिकारीसँग पहल गरेको अध्यक्ष कार्कीले बताएका छन् । सङ्घको पहलमा चिनियाँ सुरक्षाकर्मीले अलपत्र नेपालीलाई गाडीमा राखेर न्यालम हुँदै तातोपानी नाकास्थित मितेरी पुलसम्म सुरक्षित ल्याएको थियो ।
गृहमन्त्री रमेश लेखकको निर्देशनले ल्हासास्थित वाणिज्यदूत लक्ष्मी निरौलाले केरुङमा अलपत्र नेपालीलाई तातोपानी नाकासम्म ल्याईदिन चिनियाँ अधिकारीसँग समन्वय गरेका थिए । नेपाल सरकारको अनुरोधमा चीन सरकारले अलपत्र नेपालीलाई निःशुल्क खानपान, बसाइका साथ यातायात सेवासमेत निःशुल्क दिएर तातोपानी नाका ल्याएको थियो ।
तिब्बतको न्यालमस्थित विदेश विभागका प्रतिनिधिले अलपत्र नेपालीलाई तातोपानी नाका ल्याएका थिए ।
-original-thumb.jpg)