नागरिक उड्डयन प्राधिकरण र गोरखापत्रबिच समझदारीपत्रमा हस्ताक्षर

काठमाडौँ, साउन ३० गते । नेपाल नागरिक उड्डयन प्राधिकरण बबरमहल र गोरखापत्र संस्थानबीच आपसी सहयोग अभिवृद्धि गर्ने प्रयोजनका लागि समझदारीपत्रमा हस्ताक्षर भएको छ । 

समझदारी अनुसार प्राधिकरणका सूचना तथा समाचार प्राथमिकताका आधारमा गोरखापत्र संस्थानका प्रकाशनहरु गोरखापत्र दैनिक वा द राइजिङ नेपाल तथा डिजिटल प्रकाशनहरूमा प्रकाशन गरिनेछ।

शुक्रबार प्राधिकरणको प्रधान कार्यालय, बबरमहलमा भएको कार्यक्रममा समझदारी पत्रमा प्राधिकरणका निर्देशक विनोदप्रसाद न्यौपाने र गोरखापत्र संस्थानका व्यापार विभाग प्रमुख गंगबहादुर पन्थीले हस्ताक्षर गर्नुभयो। कार्यक्रममा प्राधिकरणका उपप्रबन्धक कविता कुँवर, गोरखापत्रका व्यापार प्रवर्द्धन शाखाका प्रमुख दीपक पौडेललगायत सहभागी हुनुहुन्थ्यो ।