पत्रकार यादवमाथि आक्रमण

सुधा देव

भारदह(सप्तरी), साउन ३० गते । राजविराज नगरपालिकाको मुख्य सडकमै सप्तरीका पत्रकार साैरभ यादवमाथि शुक्रबार दिउँसो सांघातिक आक्रमण भएको छ ।

जिल्ला प्रहरी कार्यालय सप्तरीका प्रहरी प्रवक्ता जितेन्द्र बस्नेतका अनुसार मोटरसाइकलमा आएका तीन जनाको समूहले यादवको हातमा छुरा प्रहार गरेका छन् । उहाँको टाउको र शरीरको विभिन्न अङ्गमा हेलमेटले कुटपिट गरेर भागेका छन् ।

घाइते भएका पत्रकार यादवको राजविराजस्थित गजेन्द्रनारायण सिंह अस्पतालमा उपचार भइरहेको छ । यता नेपाल पत्रकार महासङ्घ सप्तरीले घटनाप्रति आपत्ति व्यक्त गर्दै आक्रमण गर्ने दुई जना र उनीहरुलाई साथ दिने मोटरसाइकल चालकलाई अविलम्ब पक्राउ कारबाही गर्न जिल्ला प्रहरी कार्यालय सप्तरी र जिल्ला प्रशासन कार्यालय सप्तरीसँग माग गरेका छन् ।

यस्तै, बस्नेतले घटनामा संलग्न व्यक्तिको खोजी भइरहेको जानकारी दिनुभयो ।