मनास्लु पदमार्गको ४० स्थानमा राखियो ‘डस्टबिन’

गुणबहादुर रोका 
सुलीकोट, साउन ३० गते । उत्तरी गोरखाको हिमालपारीको चुमनुब्री गाउँपालिकाअन्तर्गत मनास्लु पदमार्गमा फोहोर सङ्कलन र व्यवस्थापनका लागि ४० स्थानमा ‘डस्टबिन’ राखिएको छ । पालिकाले मनास्लु पदमार्गमा रहेका स्थानीयको जन सहभागितमा फोहोर व्यवस्थापनका लागि पदमार्गमा ‘डस्टबिन’ राखिएको हो ।

मनास्लु पदमार्ग हुँदै वार्षिक १२ हजारभन्दा बढी आन्तरिक तथा बाह्य पर्यटकरु मनास्लु संरक्षण क्षेत्र घुम्न आउने भएकाले पनि उक्त पदमार्गमा पर्यटकहरुका लागि सफा, स्वाच्छ र हराभरा वातावरणको प्रभावकारी व्यवस्थापनका लागि ठाउँ–ठाउँमा डस्टबिन राखिएको मनास्लु संरक्षण क्षेत्र आयोजना कार्यालय गोरखाका प्रमुख सन्तोष सेरचनले जानकारी दिनुभयो ।

उहाँका अनुसार मनास्लु पदमार्गमा घुम्न आउने पर्यटकले जथाभाबी फोहोर फयाँक्ने मनास्लु लार्केपास पदमार्ग जताततै फोहोर देखिन थालेपछि त्यस फोहोरलाई व्यवस्थापन गर्न र फोहोर व्यवस्थापनबाट वातावरण संरक्षणमा सहयोग पुग्ने भएकाले पदमार्गमा ‘डस्टबिन’ राखिएको उहाँले बताउनुभयो ।

मनास्लु पदमार्गमा केही दिन अघि मात्र फोहोर देखिएकाे थियाे, कार्यालय प्रमुख सेरचनले भन्नुभयो, ‘‘स्थानीयवासीले ४० वटा डस्टबिन मनास्लु पदमार्गमा राखेपछि अहिले पदमार्ग सफा र हराभरा देखिएको छ ।’’

आयोजना कार्यालय गोरखाले डस्टबिन राख्नु अघि स्थानीय, सरोकारवाल, जनप्रतिनिधि, आमा समूहसँग डस्टबिनको प्रभावकारितको बारेमा बृहत् छलफल गरिएको आयोजना प्रमुख सेरचनको भनाइ छ ।

पदमार्गमा डस्टबिन राख्दा पदयात्रा गर्न आउने पर्यटकलाई राम्रो सन्देश जान्छ, कार्यालय प्रमुख सेरचनले भन्नुभयो, ‘‘पदमार्गमा बिस्कुट, चाउचाउ, पानी र अन्य प्लाष्टिकजन्य फोहाेर पदमार्गमा देखिएर समस्या भएपछि पदमार्ग सफा र स्वच्छ हराभराका लागि डस्टबिन राखिएको छ ।’’