• २६ असार २०८२, बिहिबार

सुदूरपश्चिममा असारमामात्रै नौ अर्ब १० करोड खर्च

blog

मुख्यमन्त्री तथा मन्त्रिपरिषदको कार्यालय । तस्बिर : अविनाश चौधरी

अविनाश चौधरी
धनगढी, असार २६ गते ।
सुदूरपश्चिम प्रदेश सरकारले चालु आर्थिक वर्षमा असारमामात्रै ३० प्रतिशत बढी बजेट खर्च गरेको छ । योजना कार्यान्वयन चरणको अन्तिमसम्म थोरै बजेट खर्चेको प्रदेश सरकारले असारमामात्रै नौ अर्ब १० करोड रुपियाँ खर्च गरेको हो ।

यस आर्थिक वर्षमा प्रदेश सरकारले कुल २२ अर्ब २८ करोड (७०.५० प्रतिशत) बजेट खर्च गरेको प्रदेश लेखा नियन्त्रक कार्यालयले जानकारी दिएको छ । जसमा पुँजीगत खर्च १२ अर्ब ४७ करोड (६६.५० प्रतिशत), चालु खर्च नौ अर्ब ८० करोड (७६.८१ प्रतिशत) रहेको प्रदेश लेखा नियन्त्रक वासुदेव जोशीले गोरखापत्रलाई जानकारी दिनुभयो ।

कुल ३१ अर्ब ५३ करोड ६६ लाख बजेट विनियोजन गरेको प्रदेश सरकारले गत जेठ मसान्तसम्म १३ अर्ब १८ करोड रुपियाँ बजेट खर्चेको थियो । असार २५ गतेमात्रै एकैदिन दुई अर्बभन्दा बढी रकम भुक्तानी भएको जोशीले बताउनुभयो ।