सिङ्गापुर, जेठ १६ गते । फ्रान्सका राष्ट्रपति इमानुएल म्याक्रोनले शुक्रबार गाजाको मानवीय स्थितिमा उचित प्रतिक्रिया नदिएमा युरोपेली देशहरूले इजरायलविरुद्ध ‘सामूहिक स्थिति कडा पार्नुपर्ने’ बताउनुभएको छ ।
गाजामा बढ्दो भोकमरी सङ्कटलाई लिएर इजरायलमाथि अन्तर्राष्ट्रिय दबाब बढ्दै जाँदा म्याक्रोनले ‘आगामी केही घण्टा र दिनहरूमा’ कारबाही आवश्यक रहेको बताउनुभयो ।
उहाँले प्यालेस्टिनी राज्यलाई शर्तसहित मान्यता दिनु ‘नैतिक कर्तव्य मात्र नभई, राजनीतिक आवश्यकता पनि हो’ भनी जोड दिनुभयो । म्याक्रोन दक्षिणपूर्वी एसियाको कूटनीतिक भ्रमणमा हुनुहुन्छ । उहाँले यस हप्ताको सुरुमा भियतनाम र इन्डोनेसियाको भ्रमण पनि गर्नुभएको थियो ।
जकार्तामा हुँदा म्याक्रोन र इन्डोनेसियाका राष्ट्रपति प्राबोवो सुबिआन्तोले गाजालाई नियन्त्रण लिने इजरायली योजना र ‘प्यालेस्टिनी जनसङ्ख्यालाई आफ्नो मातृभूमिबाट जबरजस्ती हटाउने’ कुनै पनि कदमको निन्दा गर्दै संयुक्त वक्तव्य जारी गर्नुभयो ।
पेरिसले ‘केही सर्तमा प्यालेस्टिनी राज्यका लागि मान्यताको आन्दोलनलाई अगाडि बढाउने’ आशा गरेको छ । यसमा हमासको विसैन्यीकरण र इजरायलको अस्तित्व र आफ्नो रक्षा गर्ने अधिकारको मान्यता समावेश रहेको म्याक्रोनले इन्डोनेसियाको राजधानीमा बताउनुभयो ।
दुई महिनाभन्दा बढी इजरायली नाकाबन्दीपछि यस क्षेत्रमा सहायता फिर्ता आउन थालेपछि पनि गाजाको मानवीय अवस्था डरलाग्दो रहेको छ ।
खाद्य सुरक्षा विज्ञहरूले पाँचमध्ये एक जना मानिस भोकमरीमा परेको बताएका छन् । हमासलाई नष्ट गर्ने नयाँ धक्काका रूपमा इजरायलले पनि आफ्नो सैन्य आक्रमणलाई तीव्र बनाएको छ । रासस/एएफपी
