हरिकृष्ण ऐडी
मुगु, वैशाख, ४ गते । जिल्लाका कृषकलाई आधुनिक कृषि ज्ञान सीप दिनलाई स्थापना भएको कृषि विकास कार्यालय हो। तर जिल्लाको कृषि विकास कार्यालय र प्रधानमन्त्री कृषि आधुनिकीकरण कार्यालयका कर्मचारी कार्यालयको योजना हेर्दै दिनचर्या बिताएका छन्।
छायानाथ रारा नगरपालिका वडा नं ६ का मानबहादुर रोकायाका अनुसार जिल्लामा स्थापना भएका कृषि विकास र प्रधानमन्त्री कृषि आधुनिकीकरण कार्यालयका कर्मचारीले कृषकको खेतबारीमा पुगेर आवश्यता अनुसारको आधुनिकीकरण ज्ञान र सीप दिएका छैनन्। कृषकलाई सम्बन्धित कार्यालयका कर्मचारीले खेत बारीमै ज्ञान नदिँदा परम्परागतको खेती लगाउन बाध्य रहेको उहाँले गुनासो गर्नुभयो ।
सामाजिक अभियान्ता रूपबहादुर मल्लका अनुसार कृषि विकास कार्यालय र प्रधानमन्त्री कृषि आधुनिकीकरणको कार्यालयमा भवन र सिँचाइ जस्ता योजनाका कार्यक्रम हुँदा कर्मचारीले योजनाकै काममा दौडधुप गरेको पाइन्छ । भवन र सिँचाइ जस्ता योजना राज्यका सम्बन्धित निकाय सिँचाइ र भौतिक पूर्वाधार विकास कार्यालय मार्फत यस्ता लागु गर्नुपर्ने देखिन्छ।
कृषि विकास कार्यालय र प्रधानमन्त्री कृषि आधुनिकीकरण कार्यालय मुगुका कर्मचारीले जिल्लाका किसानको सहजताका लागि खेतबारीमा कृषि र फलफूल सम्बन्धी योजना बनाउने तर व्यावसायीक रूपमा खेती गरिरहेका कृषकलाई निःस्वार्थ भावनाले प्राविधिक ज्ञान नि नसकेको बताउँछन् ।
छायानाथ रारा नगरपालिका वडा नम्बर ७ का स्थानीय कृषक रामलाल रावल किसानलाई घरदैलोमै गएर ज्ञान र सीप दिनुपर्ने बताउनुहुन्छ ।
यता कृषि विकास कार्यालय मुगुका कार्यालय अधिकृत गणेश अधिकारीका अनुसार यो आर्थिक वर्ष बगैंचा व्यवस्थापन तालिम र तरकारी खेती सम्बन्धी तालिम मन्त्रालयको योजना अनुसार जिल्लामा तालिम भएको छ। कार्यालयमा आएर कृषि सम्बन्धी जानकारी लिन आउने कृषकलाई सहजै जानकारी दिएको बताउनुभयो ।
