प्रजातन्त्रका सेनानी श्रेष्ठको निधन

अमरराज नहर्की

तनहुँ, वैशाख ३ गते । तनहुँको व्यास नगरपालिका–२ दमौली निवासी प्रजातन्त्र सेनानी मोतीकुमार श्रेष्ठको निधन भएको छ ।

श्रेष्ठको मङ्गलबार साँझ ९३ वर्षको उमेरमा निधन भएको हो । श्रेष्ठ लामो समयदेखि बिरामी रहनुभएको थियो । श्रेष्ठ २००७ सालको प्रजातन्त्र स्थापनको आन्दोलन, २०४६ सालको प्रजातन्त्र पुनर्स्थापनाको आन्दोलन र २०६२÷०६३ को जनआन्दोलन गरी तीन वटै आन्दोलनमा सहभागी हुनुभएको थियो । श्रेष्ठ व्यास नगरपालिकाको पूर्व वडा अध्यक्षसमेत रहनुभएको थियो । ।स्व. श्रेष्ठको बुधवार पशुपति आर्यघाटमा अन्तिम दाहसंस्कार गर्ने कार्यक्रम छ ।

स्वर्गीय श्रेष्ठको निधनमा नेपाल सरकारका स्वास्थ्य तथा जनसङ्ख्या मन्त्री प्रदीप पौडेल, नेपाली काँग्रेसका केन्द्रीय सदस्य एवम् प्रतिनिधि सभा सदस्य शङ्कर भण्डारी,  केन्द्रीय सदस्यहरू गोविन्द भट्टराई, ध्रुव वाग्ले, आमन्त्रित केन्द्रीय सदस्य पुष्पराज पराजुली लगायतले शोक विज्ञप्तिमा दुःख व्यक्त गर्दै स्वर्गीय श्रेष्ठको निधनले नेपाली काँग्रेसलाई अपूरणीय क्षति पुगेको बताउनुभएको छ । स्वर्गीय श्रेष्ठले प्रजातन्त्र प्राप्ति र नेपाली काँग्रेस पार्टीका लागि पुर्‍याएको योगदानको पार्टीले उच्च मूल्याङ्कन गर्ने जनाइएको छ ।