तनहुँ बस दुर्घटनाः घाइते चार जनालाई चितवन पठाइयो

अमरराज नहर्की

तनहुँ, चैत २२ गते। डुम्रे-बेँसीसहर खण्डमा पर्ने तनहुँको भानु नगरपालिका-१ अँधेरीखोला नजिक शुक्रबार ४:२५ बजे दुर्घटना हुँदा घाइते चार जनालाई चितवन रिफर गरिएको छ। 

घाइते २० मध्ये चार जनालाई चितवन रिफर गरिएको र बाँकीको बन्दीपुर गाउँपालिकाको डुम्रे बजारस्थित लक्ष्मी अस्पताल र मोती मेडिकल हलमा उपचार भइरहेको छ।

जिल्ला प्रहरी कार्यालय तनहुँका प्रहरी निरीक्षक राजु अधिकारीका अनुसार मोती मेडिकलबाट चितवन मेडिकल कलेज  रिफर गरिएको हो। 

चितवनको नारायणगढबाट लमजुङको सदरमुका बेँसीसहर जाँदै गरेको ग १ ख ६४९८ नम्बरको बस दुर्घटना हुँदा सवार ४० मध्ये २० जना घाईते भएको प्रहरीले जनाएको छ। 

घाइतेको नेपाल प्रहरी, सशस्त्र प्रहरी, नेपाली सेना र स्थानीयले उद्धार गरेका छन्। घाइतेको  बन्दीपुर गाउँपालिका–१  डुम्रेबजार स्थित लक्ष्मी अस्पतालमा उपचार भइरहेको जिल्ला प्रहरी कार्यालय तनहुँका सूचना अधिकारी प्रहरी निरीक्षक राजु अधिकारीले जानकारी दिनुभयो।  

बसमा ४० यात्रु सवार रहेको दुर्घटनाको बारेमा अनुसन्धान भइरहेको प्रहरीले जनाएको छ।