समाज रूपान्तरणमा गीत शक्तिशाली : सञ्चारमन्त्री गुरुङ

माधवप्रसाद बराल
माछापुच्छ्रे (कास्की), चैत २२ गते । सञ्चार तथा सूचना प्रविधिमन्त्री पृथ्वीसुब्बा गुरुङले समाज रूपान्तरणमा गीत सङ्गीत शक्तिशाली हुने बताउनुभएको छ । राष्ट्रिय लोक तथा दोहोरी गीत प्रतिष्ठान नेपालको आयोजनामा पोखरामा आयोजित लोक गायक पुरुषोत्तम न्यौपाने एकल साँझको शुक्रबार पोखरामा उद्घाटन गर्नुहुँदै गण्डकी प्रदेश लोक संस्कृतिको मुख्य थलो भएको बताउनुभयो ।

“समृद्धि र विकासले मात्र खुसी मिल्दैन,” उहाँले भन्नुभयो, “व्यक्तिलाई सुखी बनाउन गीत सङ्गीत आवश्यक पर्दछ र यसमा लोक गीत अझ सशक्त छ ।” गण्डकी प्रदेशले धेरै लोक श्रष्टा जन्माएको बताउँदै गुरुङले सहित्य, कला र सङ्गीतको उर्वर भूमि भएको बताउनुभयो । 

“गीत गाउन, नाच्न र रमाउने वातारण लोकतन्त्रका कारण सम्भव भएको हो”, उहाँले भन्नुभयो, “गणतन्त्रको विकल्प अरू कुनै तन्त्र हुनसक्दैन ।” सरकारका प्रवक्तासमेत रहनुभएका गुरुङले गणतन्त्रको संरक्षण, सम्वर्धन र प्रवर्धनमा गीत सङ्गीतले महत्त्वपूर्ण भूमिका खेल्ने बताउनुभयो । सभ्य समाज निर्माण गर्न गीत/सङ्गीत शसक्त माध्यम भएको उहाँको भनाइ छ ।  सव्य समाज निर्माण भएमा मात्र वास्तविक खुसी मिल्ने उहाँले बताउनुभयो ।