जङ्गलमा आगो लगाउनेविरुद्ध अपराधिक उपद्रव मुद्दा

राधा लुइटेल
फिदिम, चैत २२ गते । सार्वजनिक र नीजि जङ्गलमा आगो लगाउने प्रवृत्ति बढेपछि पाँचथरमा वनमा जथाभावी आगो लगाउनेलाई पक्राउ गरेर मुद्दा चलाउन थालिएको छ ।

पहिलो चरणमा फिदिम नगरपालिका १० बाट २ र ४ बाट १ गरी तीन जनालाई पक्राउ गरी अपराधिक उपद्रव मुद्दा दर्ता गरी अनुसन्धान सुरु गरिएको जिल्ला प्रहरी कार्यालय पाँचथरले जनाएको छ ।

पक्राउ पर्नेमा फिदिम नगरपालिका ४ का सुकमाया तामाङ, फिदिम १० का सजिता खजुम र दिलु खजुम रहेको जिल्ला प्रहरी कार्यालय पाँचथरका सूचना अधिकारी बिनालाल साहले जानकारी दिनुभयो ।

उहाँका अनुसार उनीहरु मध्ये सुकमायाले चैत १९ गते आफ्नै बारीमा झिक्रा डढाउन बालेको आगो स्थानीय सिंहदेवी सामुदायिक वनमा सकिँल्दा नियन्त्रणमा लिन हम्मेहम्मे परेको थियो । उता सुजिता र दिलुले पनि चैत १९ गते आफ्नो बारीको पात पतिङ्गर डढाउने क्रममा बालेको आगो सल्किएर खलंगाटार माविको वन क्षेत्रमा प्रवेश गर्दा नियन्त्रणमा लिन प्रहरी र स्थानीयलाई समस्या भएको थियो ।

अनुसन्धानका क्रममा उनीहरुले आगो सल्काएको खुलेपछि पक्राउ गरी अपराधिक उपद्रव शीर्षकमा मुद्दा दर्ता गरी पहिलो चरणमा पाँचथर जिल्ला अदालतबाट ५–५ दिनको म्याद थप गरेर अनुसन्धान सुरु गरेको जिल्ला प्रहरी कार्यालय पाँचथरका सूचना अधिकारी (प्रहरी निरिक्षक) बिनालाल साह(तेली) ले जानकारी दिनुभयो ।

पछिल्लो समय जिल्लाका विभिन्न वन जङ्गलमा आगो सल्काउने क्रम बढेको छ । जिल्लामा डढेलोमा पर्दा चैत २२ गते कुम्मायक ३ का प्रतिमा लावतीको मृत्यु हुनका साथै पाँच जना घाइते भएका थिए । यस्तै फिदिम नगरपालिका १३ को जङ्गलमा भएको आगोमा परी एकजना गम्भीर घाइते भएका थिए ।