आरोग्य अर्याल
कक्षाः ४, कालिका मानवज्ञान माध्यमिक विद्यालय
बुटवल, रूपन्देही
कुशल र आरोग्य मिल्ने साथी हुन् । दुवै जना एउटै विद्यालयमा कक्षा ४ मा पढ्छन् । एकदिन उनीहरू विद्यालयबाट घर फर्कंदा भएको कुराकानी–
कुशल– आरोग्य तिमी सन्चै छौ ?
आरोग्य– म त सन्चै छु । तिम्रो हालखबर के छ ?
कुशल– म पनि ठिकै छु ।
आरोग्य– आजबाट त परीक्षा सकियो । केही दिन बिदा हुन्छ । बिदामा तिमीले के गर्ने विचार गरेका छौ त ?
कुशल– घरमा आमाबुवासँग सल्लाह गर्नु पर्छ । उहाँहरूको अफिसमा बिदा मिलेदेखि त कतै घुम्न जाने कुरा भैराछ क्यारे । अनि तिमी चाहिँ के गर्छौ त ?
आरोग्य– पहाड घर जाने सल्लाह भएको छ ।
कुशल– ए हो र ?
(भोलिपल्ट भेट हुँदा)
कुशल– मेरो बुवाआमाले त इलाम जाने कुरा गर्नुभयो । अफिसमा पनि बिदा लिइसक्नुभयो अरे ।
आरोग्य– त्यहाँ तिमी के के गर्छौ त ?
कुशल– त्यहाँ त घुम्ने ठाउँ प्रशस्तै छ नि । चियाबारी, अन्तुडाँडा, कन्याम, फिक्कललगायतका धेरै पर्यटकीय ठाउँ छन् नि तर मलाई त मुस्ताङ जाने मन थियो । अस्ति हाम्रो सामाजिक गुरुआमाले मुस्ताङका बारेमा धेरै रमाइला कुरा सुनाउनुभएको थियो ।
आरोग्य– अहिले धेरै चिसो छ । त्यसैले मुस्ताङ जान सकिँदैन नि ।
कुशल– हो । हाम्रो बाबाले पनि त्यही भन्नुभयो । बरु अन्तिम परीक्षा सकिएपछि जान सकिन्छ अरे । त्यतिबेला त जाडो पनि सकिएको हुन्छ नि ।
(भोलिपल्ट भेट हुँदा)
कुशल– हामी त भोलि नै जाने भयौँ नि ।
आरोग्य– ए हो र ?
कुशल– भोलि चाहिँ घर जाने । पर्सी हाम्रो कुल पूजा हुँदै छ । पूजामा सहभागी भएर उतैबाट इलाम जाने कुरा भयो । अनि तिमी कहिले जान्छौ त घर ?
आरोग्य– हाम्रो बाबाको अफिसमा पर्सी मिटिङ छ रे । त्यसपछि मात्र जाने ।
कुशल– तिमी घर गएर के के गर्छौ त ?
आरोग्य– हाम्रो घरमा हजुरबुवा र हजुरआमा हुनुहुन्छ । गाई, भैँसी र बाख्रा पाल्नुभएको छ । अस्ती फोनमा कुरा हुँदा आमाले बाख्रा ब्याएर पाठापाठी पाएको छ भन्नुभाथ्यो । भिडियो कलमा पाठापाठी पनि देखाउनु भाथ्यो । ती त कति चन्चले हुँदा रैछन् । बुरुक बुरुक उफ्रिँदै डुल्दा रैछन् । हाम्रो गाईले धेरै दुध दिन्छ । मलाई गाईको दुध निकै मन पर्छ ।
कुशल– गाईको दुध त निकै पोसिलो हुन्छ नि । हामीलाई स्वास्थ्य विषय पढाउने गुरुले पनि भन्नुभाथ्यो नि ।
आरोग्य– हो नि । अनि म हजुरबुवासँग गाई, बाख्रा चराउन जान्छु । मलाई गाई, बाख्रा चराउन निकै रमाइलो लाग्छ ।
कुशल– ए ल ल । तिमी घर गएर रमाइलो गर । म घुम्न गएर रमाइलो गर्छु । अनि हाम्रो जाडो बिदाको अनुभव लेखेर मुना पत्रिकामा पठाउँला नि ।
आरोग्य– हुन्छ । मुना पत्रिकामा त हामी विद्यार्थीले लेखेको कुरा पनि छापिने रहेछ । त्यसैले हाम्रा अनुभव पनि लेखेर छाप्नका लागि पठाउनु पर्छ । हेर त कुरा गर्दागर्दै घर पनि आइपुगेछ । अब बिदा हुने है ?
कुशल– हुन्छ । ल ल तिम्रो बिदा रमाइलो होस् ।
आरोग्य– धन्यवाद । तिम्रो यात्रा पनि रमाइलो होस् ।
(दुवै जना रमाउँदै आआफ्ना घरतिर जान्छन् ।)
