पर्यटक आकर्षित गर्न कृत्रिम ताल

तनहुँ समाचारदाता

तनहुँ, चैत २२ गते । गण्डकी प्रदेश सरकारको लागत सहभागितामा तनहुँको एक पालिकाले पर्यटकलाई आकर्षित गर्न कृत्रिम ताल निर्माण गरिरहेको छ । व्यास नगरपालिका–१० को दुम्सीचौरमा नारेश्वर ताल निर्माण गरिरहेको छ । पर्यटन र कृषि एकैसाथ अघि बढाएर स्थानीयलाई रोजगारी दिनका लागि ताल निर्माणको लागि गण्डकी प्रदेश सरकारले मद्दत गरेको गण्डकी प्रदेश सभा सदस्य अशोककुमार श्रेष्ठले बताउनुभयो । 

सिँचाइ  मस्त्यपालन  पर्यटनमार्फत स्थानीयको आय वृद्धि गर्ने अपेक्षा लिएको बताउँदै उहाँले कामलाई तीव्रता दिनका लागि बेला बेला अनुगमन गरिरहेको बताउनुभयो । 

नारेश्वर खोलाको पानी थुनेर ताल निर्माण गरिने छ । उपभोक्ताको २५ र ऐलानी जग्गा करिब २० रोपनी गरी कुल ४५ रोपनी क्षेत्रफलमा ताल निर्माण गर्न गरिने नगरपालिकाले जनाएको छ । व्यास नगरपालिकालाई पर्यटकको आकर्षणको केन्द्रविन्दु बनाउन ताल बनाउने कार्य अघि बढाइएको नगरप्रमुख वैकुण्ठ न्यौपानेले बताउनुभयो । 

गण्डकी प्रदेश सरकारसँगको साझेदारीमा काम अघि बढाइएको उहाँले जानकारी दिनुभयो । आगामी असोजसम्ममा पूरा हुने गरी बाँध बनाउने काम तीव्र भइरहेको नगरपालिकाले जनाएको छ । गण्डकी प्रदेश सरकारबाट एक करोड ५० लाख, व्यास नगरपालिकाबाट ५० लाख र गण्डकी प्रदेशको ताल संरक्षण प्राधिकरणमार्फत १० लाख रुपियाँ विनियोजन भएको व्यास नगरपालिकाले जनाएको छ ।