आधारभूत विद्यालय चाक्लिघाट उत्कृष्ट

सन्तोष दहित

दाङ, चैत २० गते । दाङ घोराहीको विकटमा रहेको आधारभूत चाक्लिघाट विद्यालय कक्षाको ८ को परीक्षाको नतिजामा उत्कृष्ट भएको छ । घोराही उपमहानगरपालिकाको सामाजिक विकास महाशाखाले कक्षा ८ को वार्षिक नतिजा निकालेको नतिजाअनुसार आधारभूत चाक्लिघाट पालिकाभित्र प्रथम भएको हो । 

सामाजिक विकास महाशाखा प्रमुख नारायण पौडेलले घोराही उपमहानगरपालिका–२ स्थित चाक्लिघाटमा रहेको आधारभूत चाक्लिघाट प्रथम भएको जानकारी दिनुभयो । उहाँले चाक्लिघाट विद्यालयमा ८५.७१ प्रतिशत विद्यार्थी पास भएको बताउनुभयो । उक्त विद्यालय उपमहानगरपालिकाको सबैभन्दा विकट क्षेत्रमा मानिन्छ । 

पालिकाले यसअघि घोषणा गरेको नमुना विद्यालयलाई उक्त विद्यालयले टप गरेको हो । पालिकाकाभित्र चलेको विद्यालयको नतिजा कमजोर देखिएको उहाँले बताउनुभयो । उहाँको अनुसार घोराही उपमहानगरपालिका भित्र ४१ वटा सामुदायिक र ५८ वटा संस्थागत विद्यालय रहेका छन् ।

४१ वटा सामुदायिक विद्यालयमध्ये आधारभूत विद्यालय चाक्लिघाट प्रथम भएको हो । उहाँको अनुसार आधारभूत चाक्लिघाट विद्यालय ८५.७१ प्रतिशत, आधारभूत गिठेपानी विद्यालय ६४.२५ प्रतिशत विद्यार्थी पास भएर दोस्रो भएको छ । यस्तै, महेन्द्र माविमा ६२.२५ प्रतिशत, मावि निघुवार ५०.९४ प्रतिशत र मावि रझेनामा ५०.३८ प्रतिशत  विद्यार्थी पास भएका छन् । 

यस्तै, सामुदायिक विद्यालयमध्ये चार विद्यालयमा नतिजा भने शून्य छ । महाशाखा प्रमुख पौडेलका अनुसार एक नमुना विद्यालय एकसहित घोराहीमा चार वटा विद्यालयको नतिजा शून्य अएको हो । उहाँका अनुसार सिर्जनशील आधारभूत विद्यालय बाहुनडाँडा, घोराही–मदरसा दारुल हुँदा अल्सल्फिया आधारभूत विद्यालय र घोराही–७ मा रहेको माता पवित्रा संवेद आधारभूत विद्यालय छ । 

पालिकाकै विकट मानिने आधारभूत विद्यालय चाक्लिघाट उत्कृष्ट भएपछि विद्यालयका प्रधानाध्यापक लक्ष्मण रिजालले शिक्षक र विद्यार्थीको अथक मिहिनेतको कारण यो परिणाम आएको बताउनुभयो । 

कसैले नसोचेको र नपत्याएको हाम्रो विद्यालाय पालिकाभित्र प्रथम भएकोमा हामीलाई गौरबको महसुस भएको छ, उहाँले भन्नुभयो, ७ जना विद्यार्थीमध्ये ६ जना उत्कृष्ट नतिजा ल्याएर पास हुनुभएको छ, एक जनाले चान्स परीक्षा पाउनुभएको छ । उहाँका अनुसार विद्यालायमा कुल विद्यार्थी ९६ जना छन् भने  शिक्षक, शिक्षिका ११ जना रहेका छन् ।