रौतहटका स्थानीय तहमा विद्युतीय भुक्तानी प्रणाली सुरु

प्रवीण कुमार शर्मा 

चन्द्रपुर (रौतहट), चैत २० गते । रौतहटको १८ वटै स्थानीय तहमा विद्युतीय भुक्तानी प्रणालीबाट आर्थिक कारोबार सुरु भएको छ । कोष तथा लेखा नियन्त्रक कार्यालय रौतहटका प्रमुख कोष नियन्त्रक देवी प्रसाद गौतमले विद्युतीय माध्यमबाट भुक्तानी गर्न सबै स्थानीय तहलाई निर्देशन दिएपछि १८ वटै पालिकाले कार्यान्वयनमा ल्याएको हो ।

महालेखा नियन्त्रक कार्यालयले स्थानीय सञ्चित कोष व्यवस्थापन प्रणाली (सूत्र) मार्फत विद्युतीय कोष हस्तान्तरण गर्न सकिने प्रणाली २०७८ सालमै ल्याए पनि रौतहटमा यसको कार्यान्वयनको अवस्था फित्तलो रहेको थियो । 

विद्युतीय माध्यमबाट वास्तविक समयमा भुक्तानी हुने साथै छिटो, छरितो, भरपर्दो भएकोले यसको  प्रयोग गर्ने गरेको चन्द्रपुर नगरपालिका रौतहटका लेखा प्रमुख अर्पणा  देवकोटाले बताउनुभयो ।

विद्युतीय माध्यमबाट भुक्तानी गर्दा स्थानीय तहमा पारदर्शिता कायम गर्न सहयोग गर्ने भएकोले पनि चन्द्रपुर नगरपालिकाले यसको प्रयोग ३ वर्षदेखि गर्ने गरेको लेखा प्रमुख देवकोटाले बताउनुभयो । सुशासन, वित्तीय अनुशासन र उत्तरदायित्व कायम गर्न सघाउ पुग्ने  भएकोले  विद्युतीय कारोबारको सुविधा नलिने स्थानीय तहको खाता समेत रोक्का गरेको कोष तथा लेखा नियन्त्रक कार्यालयका प्रमुख गौतमले बताउनुभयो ।

रौतहटका १८ स्थानीय तहमध्ये राजपुर नगरपालिका तथा यमुनामाइ गाउँपालिकाले विद्युतीय कारोबारको सुबिधा नलिएको कारण दुवै स्थानीय तहको खाता रोक्का गरिएको थियो । हाल आएर रौतहटका सवै स्थानीय तहले विद्युतीय माध्यमबाट भुक्तानी सेवा सुरु गरेको र यसको प्रयोग गर्ने गरेको ÷नगरेको अनुगमन समेत भइरहेको कोष तथा लेखा नियन्त्रक कार्यालयका प्रमुख गौतमले बताउनुभयो ।

स्थानीय तहमा विकास निर्माणका काममा उपभोक्ता समितिका पदाधिकारी तथा सेवाग्राहीसँग कर्मचारी र स्थानीय तहका जनप्रतिनिधिका सचिवालयका सदस्यले सिधै रकम मोलमोलाई गर्ने विकृति देखिएकोले यसले केहि हद सम्म न्यूनीकरण गर्ने आशा पलाएको छ ।