सहकारी गाउँमा सफल भयो : मन्त्री कार्की

रमेश विश्वकर्मा 

गुल्मी, चैत २० गते । लुम्बिनी प्रदेशका आर्थिक मामिला तथा योजना मन्त्री धनेन्द्र कार्कीले सहकारी सहरमा भन्दा गाउँमा सफल भएको बताउनुभएको छ । बुधबार ६८ औं राष्ट्रिय सहकारी दिवसको अवसरमा गुल्मीको सदरमुकाम तम्घासमा भएको कार्यक्रमलाई सम्बोधन गर्नुहुँदै उहाँले यस्तो बताउनुभएको हो । 

मन्त्री कार्कीले ग्रामीण क्षेत्रमा सञ्चालित सहकारीले महत्त्वपूर्ण योगदान पुर्‍याउँदै आएको बताउनुभयो । सहकारी सीप र जागरको पर्याय भएको भन्दै उहाँले सहकारीलाई चलायमान बनाउन सहकारी अभियान्ता एकताबद्ध भएर लाग्नुपर्ने बताउनुभयो । सहकारीले सरकारको राजश्वमा पनि महत्त्वपूर्ण योगदान महत्त्वपूर्ण पुर्‍याएको हुँदा राज्यले आवश्यक सहकारी प्रशिक्षण र अभिमुखिकरण कार्यक्रमलाई बृहत्तर रूपमा लैजानुपर्ने उहाँले बताउनुभयो ।

पछिल्लो समय देशमा विभिन्न नाममा हुल हुज्जत गर्ने प्रवृत्ति बढेको भन्दै त्यस्ता गतिविधिले देशले निकाश नपाउने धारणा राख्नुभयो । त्यसैगरी मन्त्री कार्कीले पूर्व राजाले देश चलाउन नसकेर राजगद्दी छोड्नु परेको भन्दै वर्तमान व्यवस्थाको विरुद्धमा कोही लाग्न नहुने बताउनुभयो ।