बाबुराम शर्मा
दोलखा, चैत २० गते । दोलखाको गौरीशङ्कर गाउँपालिका–१ जुगुका ३९ वर्षीय मोहनबहादुर कार्कीको भीरबाट लडेर मृत्यु भएको छ ।
लडेर घाइते कार्कीको उपचारको क्रममा मङ्गलबार राति ट्रमा सेन्टर काठमाडौंमा मृत्यु भएको जिल्ला प्रहरी कार्यालय दोलखाका प्रहरी निरीक्षक दाताराम अधिकारीले जानकारी दिनुभयो ।
उहाँका अनुसार मङ्गलबार दिउँसो करिब ३ बजे घरबाट घाँस काट्न गएका कार्की गाउँको तिरेपु भीरबाट तल खसेर घाइते अवस्था फेला पर्नुभएको थियो । लडेर घाइते भएका निजलाई प्रभु एयर हेलिकोप्टरबाट काठमाडौं लगिएको थियो ।
लडेर घाइते भएका कार्कीको टाउँकोमा गहिरो चोट लागेकाले बोल्न नसक्ने अवस्थामा उपचारका लागि तत्काल काठमाडौं लगिएको थियो ।
