राधाकृष्ण डुम्रे
वालिङ (स्याङ्जा),चैत २० गते । पुतलीबजार नगरपालिका र बिरुवा गाउँपालिका जोड्ने सडक कालोपत्रे गर्ने काम धमाधम भइरहेको छ । पुतलीबजार–१० राङखोलादेखि धौवादी सडकखण्डमा कालोपत्रे गर्ने कार्य भइरहेको हो । यो सडक कालोपत्रे पश्चात बिरुवा गाउँपालिका पुग्न सहज हुने गाउँपालिकाका अध्यक्ष सूर्यबहादुर कुँवरले जानकारी दिनुभयो ।
गणेशकुन्द इन्द्रयणी रक्तकन्या जेभी, काठमाडौंले ठेक्का सम्झौता गरी स्तरोन्नतिसहित कालोपत्रेको काम भइरहेको हो । १९ करोड ९३ लाख ५३ हजार १०४ रुपियाँको लागतमा ६.२ किमी कालोपत्रे सम्पन्न हुने पूर्वाधार कार्यालय स्याङ्जाका प्रमुख दयाराम अधिकारीले जानकारी दिनुभयो । प्रदेश सरकारबाट विनियोजन भएको बजेटले सडकको स्त्तरोन्नति र कालोपत्रे गरिने उहाँको भनाइ छ । २०८२ साउन मसान्तसम्ममा काम सम्पन्न गर्ने गरी काम भइरहेको कार्यालयको भनाइ छ ।
स्याङ्जा सदरमुकामबाट बिरुवा गाउँपालिका पुग्न यो सडक कालोपत्रेसँगै सबै १७ किमी बाटो कालोपत्रे हुने छ । सिद्धार्थ राजमार्गको राङ्खोलाबाट बिरुवा गाउँपालिका पुग्ने छोटो र सहज सडक हो ।
यो सडकको कालोपत्रे पूरा भए पछि बिरुवा गाउँपालिकाको कार्यालयसम्म पुग्ने सडक कालोपत्रे पूरा हुने छ । बिरुवा क्षेत्रको केही सडक यस अघि नै कालोपत्रे भइसकेको छ । ११ पालिका रहेको स्याङ्जामा हरिनास गाउँपालिकाको कार्यालयसम्म पुग्ने सडक मात्रै कालोपत्रे हुन बाँकी रहने छ ।
