नवीन सुवेदी
सुर्खेत,चैत २० गते । मध्यपश्चिम विश्वविद्यालयको स्वतन्त्र विद्यार्थी युनियन (स्ववियु) को नेतृत्वमा नेपाली कांग्रेस निकट नेपाल विद्यार्थी सङ्गठनको प्यानल नै विजयी भएको छ । अध्यक्षमा नेविसंघका विवेक खड्का नेतृवको प्यानल नै विजयी भएको हो ।
सोमबार भएको मतदानबाट नेकपा (एमाले) निकट अनेरास्ववियुका जगतजंग शाहीलाई पराजित गर्दै खड्का अध्यक्षमा निर्वाचित हुनुभएको हो । सार्वजनिक नतिजा अनुसार खड्काले ११ सय ८७ मत प्राप्त गरी विजयी हुँदा उहाँका प्रतिद्वन्द्वी शाहीले नौ सय सात मत प्राप्त गर्नुभयो ।
अध्यक्षका अन्य प्रत्यासीहरु प्रकाश विकले दुई सय ७५ र मिलन बिसीले दुई सय ३१ मत प्राप्त गर्नुभयो । कुल चार हजार तीन सय ८३ मतदातामध्ये दुई हजार आठ सय ६४ जनाले मतदान गरेका थिए ।
स्ववियु निर्वाचन कार्यविधि अनुसार अध्यक्ष, सचिव, कोषाध्यक्ष गरी तीन र बाँकी सदस्य गरी १७ सदस्यीय कार्यसमिति रहने व्यवस्था छ ।
मध्यपश्चिम विश्वविद्यालयमा चार हजार तीन सय ८३ मतदाता छन् । ८ भदौ २०७३ मा भएको पहिलो स्ववियु निर्वाचनबाट निर्वाचित पदाधिकारीको अवधि २०७६ मा सकिएपछि एमयूको स्ववियु नेतृत्वविहीन छ । २०७३ भदौमा सम्पन्न पहिलो निर्वाचनबाट कांग्रेसनिकट नेविसंघका झक्कबहादुर शाही स्ववियु अध्यक्षमा निर्वाचित हुनुभएको थियो ।
