गोरखापत्र समाचारदाता
काठमाडौँ, जेठ १९ गते ।‘स्वच्छ सन्तुलित आहार, स्वस्थ जीवनको आधार’ भन्ने नाराका साथ यस वर्षको खाद्य स्वच्छता दिवस बुधबारदेखि सुरु भएको छ । सप्ताहव्यापी रूपमा सञ्चालन हुने यो कार्यक्रम जेठ २४ गतेसम्म खाद्य स्वच्छतासम्बन्धी कार्यक्रम गरी मनाउने योजना छ ।
खाद्य, प्रविधि तथा गुण नियन्त्रण विभागले बुधबार राजधानीमा आयोजित पत्रकार सम्मेलनमा विभागका महानिर्देशक डा. मतिना वैद्य जोशीले खाद्य स्वच्छता सप्ताहमा आमउपभोक्तालाई खाद्य स्वच्छतासम्बन्धी चेतनामूलक कार्यक्रम गरिने जानकारी दिनुभयो ।
उहाँले स्वस्थ तथा सबल जनशक्ति राष्ट्र निर्माणको महत्त्वपूर्ण आधार स्तम्भ भएकाले समग्र देश विकासका लागि समेत स्वच्छ र सन्तुलित खानपानलाई महìव दिनु यस सप्ताहको उद्देश्य रहेको जानकारी दिनुभयो । उहाँका अनुसार यस अवधिका विभाग र मातहतका कार्यालयबाट होटल, रेस्टुरेन्ट अनुगमन निरीक्षण एवं स्तरीकृत गरी लोगो वितरण गरिनेछ ।
विश्व स्वास्थ्य सङ्गठन (डब्लूएचओ)को तथ्याङ्कअनुसार अस्वस्थकर खानेकुराका कारण विश्वभर प्रत्येक वर्ष करिब ५५ करोड मानिस बिरामी हुने गरेका छन् भने अस्वस्थकर खाना उपभोगले दुई लाख ३० हजारको मृत्यु हुने गरेको छ । डब्लुएचओको तथ्याङ्कअनुसार विश्वमा हरेक वर्ष अस्वच्छकर एवं दूषित खाद्य पदार्थबाट झाडापखालादेखि क्यान्सरसम्म गरी दुई सयभन्दा बढी रोग लाग्ने गरेको पाइएको छ ।
