सिराज खान
नेपालगन्ज, फागुन २६ गते । ट्राफिक व्यवस्थापनमा उत्कृष्ट काम गर्दैआएको उल्लेख गर्दै ट्राफिक पोस्ट नेपालगन्जका प्रमुख प्रहरी वरिष्ठ सई प्रबिण आचार्यलाई आइतबार यहाँ सम्मानित गरिएको छ ।
नेपालगन्जको ट्राफिक व्यवस्थापन मिलाउन उत्कृष्ट कार्य गरेको जनाउँदै सुरक्षित यात्रा नेपालले नेपालगन्जमा आयोजित एक कार्यक्रममा उहाँलाई सम्मान गरेको हो ।
वरिष्ठ सई आचार्यलाई लुम्बिनी प्रदेश प्रहरी प्रमुख डिआइजी दानबहादुर कार्कीले सम्मानपत्र प्रदान गरेर सम्मान गर्नुभयो । सो अवसरमा डिआइजी कार्कीले राम्रो र उत्कृष्ट कार्य गर्ने प्रहरीलाई सम्मान गर्ने प्रहरी प्रधान कार्यालयको नीति रहेको बताउनुभयो ।
उहाँले सम्मानले थप राम्रो काम गर्ने हौसला मिल्ने जनाउँदै यसैगरी प्रहरी सङ्गठनको मान मर्यादा बढाउने काम हरेक प्रहरीले गर्नुपर्नेमा जोड दिनुभयो । सम्मानपत्र ग्रहण पछि वरिष्ठ सई आचार्यले सम्मानले अझ धेरै जिम्मेवारी थपेको जनाउँदै स्थानीयवासीको सहयोग भएपछि काम गर्न सहज हुने अनुभव भएको बताउनुभयो ।
उहाँले बाँकेको ट्राफिक व्यवस्थापनमा सुधारका लागि अझ दिलोज्यान लगाएर काम गर्ने प्रतिबद्धता जनाउनुभयो । वरिष्ठ सई आचार्यले भन्नुभयो, ‘सम्मानले हौसलासँगै थप जिम्मेवारी थपेको छ । बाँकेको ट्राफिक व्यवस्थापन सुधारमा कुनै कसर बाँकी राख्ने छैन ।’
दुर्घटना न्युनीकरण, सुरक्षित तथा मर्यादित यात्राका लागि आचार्यले महत्त्वपूर्ण भूमिका खेलेकाले सम्मान गरिएको सुरक्षित यात्रा नेपालका अध्यक्ष कृष्णप्रसाद बेलवासेले बताउनुभयो ।
उहाँका अनुसार सुरक्षित र मर्यादित यात्राका लागि ट्राफिक प्रहरीको भूमिका महत्त्वपूर्ण रहन्छ । त्यसैमा वरिष्ठ सई आचार्यको भूमिका राम्रो देखिएको छ । ट्राफिकपोस्ट नेपालगन्जको प्रमुख भएर आएपछि वरिष्ठ सई आचार्यले उपमहानगरको ट्राफिक व्यवस्थापन सुधारमा उल्लेख्य भूमिका निर्वाह गर्दै आउनुभएको छ ।
उहाँले ट्राफिक लाइटको शुभारम्भदेखि व्यवस्थापन, छाडा चौपायालाई सडकबाट हटाउन तथा पुरानो बजार सदरलाइनको ट्राफिक व्यवस्थापनमा सुधारका लागि महत्त्वपूर्ण भूमिका निर्वाह गर्नुभएको छ ।
