राजकुमार भट्टराई
खोटाङ, फागुन ५ गते । हलेसी बजारमा लागेको भीषण आगलागीबाट सात करोडभन्दा बढीको क्षति भएको छ । ग्यास लिक हुँदा सुरु भएको आगोले भीषणरुप लिँदा सात करोड ३० लाख बराबरको क्षति भएको प्रहरीले प्रारम्भिक अनुमान गरेको छ ।
खोटाङको हलेसी तुवाचुङ नगरपालिका–७ महादेवस्थानस्थित हलेसीबजारमा आइतबार साँझ ७ बजेबाट आगलागी सुरु भएको थियो । पदमशेर राईको हार्डवयर पसलमा राखिएको खाना पकाउने ग्यास लिक हुँदा आगलागी सुरु भएको थियो । काठ र जस्तापाताले बनेको तीनतले घरको पहिलो तलामा खाना पकाउने ग्यास लिक भएर सुरु भएको आगोले भीषणरुप लिएको थियो ।
आगलागीबाट पदमशेरको घर पूर्णरुपमा जलेर नष्ट भएको छ । घरको दोस्रो तलामा रहेको निर्धनउत्थान लघुवित्त संस्थाको कार्यालय समेत जलेर खरानी भएको छ । आगलागीबाट पदमशेरको चार करोडको क्षति भएको जिल्ला प्रहरी कार्यालय खोटाङले जनाएको छ । नजिकै रहेको आइरख राईको न्यू कल्याण होटल सञ्चालन भइरहेको चारतले पक्की घर र पछाडीसँगै रहेको निजकै काठको दुईतले घर पूर्ण क्षति हुँदा दुई करोड ५० लाख क्षति भएको छ ।
यसैगरी, प्रकाशचन्द्र गिरीको हलेसी दर्शन होटलको फलामे ट्रसले बनेको एकतले भान्सा घर र पक्की घरमा आंशिक क्षति हुँदा ३० लाख र भिरणशेर राईको पारुहाङ होटलको चारतले पक्की घरको दोस्रो र तेस्रो तलामा आंशिक क्षति हुँदा ५० लाखको क्षति भएको प्रहरीले जनाएको छ ।
साँझ ७ बजेबाट सुरु भएको आगो राति १ बजेमात्र पूर्णरुपमा नियन्त्रणमा आएको थियो । स्थानीय नागरिक, नेपाल प्रहरी र नगर प्रहरीले जोखिम मोलेर आगलागी नियन्त्रणमा लागेका थिए । आगलागी भीषणरुपमा फैलिएपछि दमकल नहुँदा नियन्त्रण गर्न कठिन भएको थियो । पानी बोक्ने ट्याङ्करको सहायतामा आगलागी नियन्त्रणमा आएको बताइएको छ ।
हलेसी क्षेत्र पानीको समस्यग्रस्त क्षेत्र हो । स्थानीयले रिजर्भ गरेर राखेको पानी ट्याङ्करले ओसार आगलागी नियन्त्रण गरिएको हलेसी तुवाचुङ नगरपालिकाका प्रमुख विमला राईले जानकारी दिनुभयो । आगलागी नियन्त्रणमा पानी बोक्ने, ट्याङकरसहित जेसिबी लगायतका मेसिनहरु पनि प्रयोग गरिएको थियो । आगलागीबाट मानवीय र चौपायामा भने क्षति भएको छैन ।
दमकल नहुँदा आगलागी नियन्त्रण गर्न कठिन भएको स्थानीयले बताएका छन् । हाल जिल्लामा एउटा पनि दमकल छैन । दिक्तेल रुपाकोट मझुवागढी नगरपालिकाले खरिद गरेको दमकल सुरु दिनबाटै बिग्रिएर थन्किएको छ ।
-square-thumb.jpg)
-original-thumb.jpg)
