दोलखा, फागुन २ गते। नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले अब प्रत्यक्ष कार्यकारी राष्ट्रपति र पूर्ण समानुपातिक निर्वाचन प्रणालीको एजेण्डा अघि बढाउने बताउनुभएको छ।
३० औँ जनयुद्ध दिवस तथा माओवादी केन्द्र जिरी नगरपालिका दोलखाको तेस्रो अधिवेशन उद्घाटन समारोहलाई सम्बोधन गर्दै शुक्रबार उहाँले यस्तो धारणा राख्नुभएको हो।
संविधान बनाउँदा बाध्यताका कारण आफ्ना मुद्दालाई फरक मतको रुपमा राखेर सम्झौतामा अघि बढेको उल्लेख गर्दै उहाँले अब यसबाट मात्रै राजनीतिक स्थायित्व कायम हुने सबै वर्ग र समुदायले थप राजनीतिक अधिकार प्राप्त गर्ने बताउनुभयो।
आफूले तेस्रोपटक प्रधाननमन्त्री हुँदा सुशासन, सामाजिक न्याय र समृद्धिको ऐतिहासिक अभियान थालनी गर्न पाएकोमा गर्व महसुस भएको उहाँको दाबी छ।
उहाँले सामाजिक न्याय अन्तर्गत वैदेशिक रोजगारीमा गएका नेपालीका लागि सामाजिक सुरक्षा कोष कार्यान्वयन, मिटरब्याज पीडितलाई न्याय र नागरिकताबिहीनलाई नागरिकता प्रदान गर्ने कानुन निर्माण लगायतका महत्वपूर्ण कामको थालनी गरिएको बताउनुभयो।
आफू प्रधानमन्त्री हुँदा भारत र चीन भ्रमणमा गएको बेलामा विद्युत व्यापार, कृषि उत्पादन वृद्धि लगायतका विभिन्न सम्झौता गरिएको उल्लेख गर्दै उहाँले चीनसँगका विभिन्न परम्परागत नाका खोल्ने सहमति गरेको जानकारी दिनुभयो।
आफूले तीनपटक चिनियाँ राष्ट्रपतिसँग छलफल गरेपछि भूकम्पपछि रोकिएको कोदारी राजमार्ग सञ्चालन लगायतका प्रक्रिया अघि बढेको पनि उहाँले स्पष्ट गर्नुभयो।
नेपालको मिनी स्वीटजरल्याण्ड भनेर चिनिने जिरी नेपालको महत्वपूर्ण पर्यटकीय स्थल रहेको उल्लेख गर्दै उहाँले यहाँको भाषिक र सांस्कृतिक महत्त्व पनि उत्तिकै मौलिक र उच्च रहेको बताउनुभयो। सो क्रममा अध्यक्ष प्रचण्डले विभिन्न पार्टी परित्याग गरी माओवादी केन्द्रमा प्रवेश गर्नेलाई स्वागत गर्नुभएको छ।
