अमरराज नहर्की
तनहुँ, माघ २३ गते । प्रेस चौतारी नेपाल तनहुँ शाखामा स्थापित प्रेस चौतारी पत्रकारिता पुरस्कार त्रिभुवन श्रेष्ठलाई प्रदान गरिएको छ । श्रेष्ठ प्रेस चौतारी नेपाल तनहुँ शाखाका पूर्व अध्यक्ष हुनुहुन्छ ।
शाखाको मङ्गलबार दमौलीमा आयोजित दशौं जिल्ला अधिवेशनका अवसरमा श्रेष्ठलाई उक्त पुरस्कार प्रदान गरिएको हो । नेकपा (एमाले) का केन्द्रीय सदस्य केदार सिग्देल, प्रेस चौतारी नेपाल तनहुँका अध्यक्ष राजकुमार श्रेष्ठ विविले संयुक्त रुपमा उक्त पुरस्कार श्रेष्ठलाई प्रदान गर्नुभयो । उक्त पुरस्कारको राशी दश हजार रुपियाँ छ ।
प्रेस चौतारीले मरेर बाँचेकाहरु र अन्तिम सन्देश नामक वृत्तचित्र प्रदर्शन गरेर बेचेको रकमबाट एक लाख रुपियाँको पत्रकारिता अक्षयकोष स्थापना गरेको थियो । उक्त कोषको व्याजबाट प्रत्येक वर्ष एक जना क्रियाशील पत्रकारलाई उक्त पुरस्कार प्रदान गर्ने गरिएको छ । यसअघि उक्त पुरस्कारबाट वरिष्ठ पत्रकार विश्वबन्धु भण्डारी, शाखाका पूर्व अध्यक्ष प्रेमप्रसाद पौडेल, प्रकाशचन्द्र भट्टराई, नारायण खड्का, वसन्ती बास्तोला, कृष्ण न्यौपाने पुरस्कृत भइसक्नुभएको छ ।
