फडिन्द्र अधिकारी
लेखनाथ, माघ १८ गते । राष्ट्रिय तथा अन्तर्राष्ट्रिय अन्तर क्लब आमन्त्रित आहा रारा पोखरा गोल्डकप फुटबल प्रतियोगिताको उद्घाटन खेल आयोजक सहारा क्लब पोखरा र विभागीय नेपाल पुसिलबिच हुने भएको छ ।
आयोजक सहारा क्लब पोखराले यही माघ २२ देखि सञ्चालन गर्ने २४ औं संस्करणको प्रतियोगिताको टाइसिट बिहीबार सार्वजनिक गरिएको हो । प्रतियोगितामा भारत, बेलायत, उज्जेकिस्तानका टिमसहित नेपालका ए डिभिजन क्लब गरी १२ टिमले भाग लिँदैछन् । फागुन ३ मा हुने फाइनलअघि माघ ३० मा पहिलो सेमिफाइनल र १ फागुनमा दोस्रो सेमिफाइनल हुने प्रतियोगिता संयोजक पूर्णबहादुर गुरुङले बताउनुभयो ।
प्रतियोगिताको समूह ‘ए’ तर्फ आयोजकसहित नेपाल पुलिस, एनआरटी, चर्च ब्वाइज युनाइटेड, त्रिभुवन आर्मी क्लब र बेलायतको ब्रिगेड ब्वाइज क्लब छन् । तीमध्ये युके र आर्मीले सिधैँ क्रमशः पहिलो र तेस्रो क्वाटरफाइनल खेल्नेछन् ।
प्रतियोगिताको समूह ‘बि’ मा एपिएफ, मच्छिन्द्र, भारतको थन्डरबोल्ट नर्थ युनाइटेड, संकटा, थ्रिस्टार र उज्जेकिस्तानको ब्लाक बुल्स फुटबल क्लब छन् । तीमध्ये थ्रिस्टार र उजेकिस्तानले सिधैँ क्रमशः दोस्रो र चौथो क्वाटरफाइनल खेल्नेछन् ।
पोखरा रङ्गशालामा हुने प्रतियोगिताको संरक्षकमा पोखरा महानगरपालिका छ । प्रतियोगितामा एक करोड ५१ लाख आम्दानी, एक करोड ४२ लाख खर्च र आठ लाख ८० हजार बचत हुने अनुमान गरिएको छ । प्रतियोगितामा विजेताले १२ लाख एक हजार र उपविजेताले ६ लाख एक हजार नगद पाउने छन् ।
गत संस्करणको प्रतियोगितामा त्रिभुवन आर्मी विजेता र थ्रि स्टार उपविजेता बनेका थिए । २०५५ सालमा स्थापित सहारा क्लब पोखराले प्रतियोगिताबाट बचत रकम सूर्यबहादुर केसी स्मृति सहारा फुटबल एकेडेमीमा खर्चिने गरेको छ । क्लब अध्यक्ष केशवराज बरालले एकेडेमीमा ३० बालक आश्रित रहेको उल्लेख गर्नुभयो ।
