विराटनगर समाचारदाता
विराटनगर, माघ १७ गते । साहित्य क्षेत्रमा योगदान गर्नेहरूलाई प्रदान गर्ने गरी विराटनगरमा तीन वटा राष्ट्रिय पुरस्कारको स्थापना गरिएको छ । मुक्तक दिवसका अवसरमा नेपाल मुक्तक प्रतिष्ठान कोशी प्रदेश विराटनगरले बुधबार विराटनगरमा आयोजना गरेको पुरस्कार स्थापनाको घोषणा तथा मुक्तक वाचन कार्यक्रममा पुरस्कारको घोषणा गरिएको हो । आयोजक संस्थाका अध्यक्ष कवि एवं समालोचक बाबुराम पोखरेलका अनुसार नन्दलाल स्मृति साहित्य पुरस्कार, माधव–नर्वदा पोखरेल स्मृति साहित्य पुरस्कार र नन्दकुमारी पोखरेल स्मृति साहित्य पुरस्कार स्थापना गरिएको हो ।
कार्यक्रममा अक्षयकोष दाताहरूका तर्फबाट बोल्दै समाजसेवी विश्वकान्त दाहालले साहित्य क्षेत्रमा लागेका अग्रजहरूको सम्मान तथा अनुजहरूलाई प्रेरणा र सहयोगका लागि पुरस्कारको स्थापना गरिएको बताउनुभयो । संस्थापक परिवारकी सदस्य कवि नानुमैया दाहालले साहित्य समाजको अग्रगामी रूपान्तरणको सशक्त हतियार भएकोले नेपाली समाजलाई सकारात्मक मार्गबाट अगाडि बढाउन तथा नेपाली साहित्यको श्रीवृद्धि र विकासमा योगदान पुगोस् भन्ने पवित्र उद्देश्यले यी पुरस्कारको स्थापना गरिएको बताउनुभयो ।
