सहिद सूर्यनाथ अस्पताल सञ्चालनको माग

ढल्केबर समाचारदाता

ढल्केबर, माघ १५ गते । धनुषाको सहिदनगर नगरपालिका–८, डुमरियामा नौ वर्षदेखि अलपत्र अवस्थामा रहेको सहिद सूर्यनाथ राण स्मृति अस्पताल सञ्चालनमा ल्याउन स्थानीयले माग गरेका छन् । 

जिल्लाको पूर्वी भेगका बासिन्दालाई स्वास्थ्य सेवा उपलब्ध गराउने उद्देश्यले २०७२ सालमा निर्माण गरिएको सो अस्पताल सम्बन्धित निकायको बेवास्ताका कारण अलपत्र बनेको हो । 

स्थानीय बासिन्दाले अस्पताल सञ्चालनको माग गर्दै पटक पटक प्रदर्शन गर्दै आएका छन् । पछिल्लो एक सातादेखि जनमत पार्टीका कार्यकर्ताले अस्पताल सञ्चालनको माग गर्दै विरोध प्रदर्शन गर्दै आएका छन् । भदौ १८ गते डुमरियाका स्थानीयले सो अस्पताल सञ्चालनका लागि मधेश प्रदेशका मुख्यमन्त्री सतीशकुमार सिंहको ध्यानाकर्षण गराउनुभएको थियो । त्यसबखत मुख्यमन्त्री सिंहले अस्पताल छिट्टै सञ्चालनमा ल्याउने प्रतिबद्धता व्यक्त गर्दै दुई दिनभित्रमै अस्पताल सञ्चालनका लागि आवश्यक स्वास्थ्य उपकरण तथा औषधी पठाउनुभएको थियो । प्रदेश सरकारले आफ्नो स्वामित्वमा लिएर अस्पताललाई ५० शøयाका रूपमा सञ्चालनका लागि अनुमति दिने निर्णय मन्त्रीपरिषद्बाट निर्णयसमेत गरेको थियो । 

स्वास्थ्य तथा जनसङ्ख्या मन्त्रालयका सचिव डा. सञ्जय ठाकुरले सञ्चालन गर्ने निर्णय भए पनि चिकित्ससहितका आवश्यक जनशक्ति नभएकाले अस्पताल सञ्चालन हुन नसकेको बताउनुभयो । आवश्यक जनशक्ति व्यवस्थापनको काम भइरहेको उहाँले जानकारी दिनुभयो । अस्पताल चार करोड रुपियाँको लागतमा निर्माण भएको हो । १५ वर्षअघि तत्कालीन स्वास्थ्यमन्त्री गिरिराजमणि पोखरेलले सो अस्पतालको शिलान्यास गर्नुभएको थियो । अस्पतालका लागि स्थानीय १५ जनाले करिब दुई बिघा जग्गा दान गर्नुभएको छ ।

स्थानीयका अनुसार २०७२ सालमा निर्माणको काम सकिए पनि अस्पताल सञ्चालनको विधि र प्रव्रिmया अझै अन्योलमा रहेको छ । प्रदेश सरकारले स्वास्थ्य उपकरण र औषधी पठाए पनि अस्पताल सञ्चालनमा आउने आशा पलाएको छैन ।

स्थानीय वीरेन्द्र यादवले अस्पताल सञ्चालनमा आउँछ भन्ने अझै शङ्का रहेको बताउनुभयो । उहाँले भन्नुभयो, “मधेश सरकारले स्वास्थ्य उपकरण तथा औषधी त पठायो तर स्वास्थ्यकर्मीलगायत जनशक्तिको अझै टुङ्गो छैन । सेवा दिन डाक्टर आउनुप¥यो । अब डाक्टर कहिले आउने हो, निश्चित छैन ।” यस भेगमा सुविधासम्पन्न अस्पताल नहुँदा उपचारका लागि बिरामीलाई जनकपुर लैजानुपर्ने बाध्यता रहेको यादवको भनाइ छ । 

उहाँले अस्पताल सञ्चालनमा राजनीतिकरण भएको गुनासो गर्दै भन्नुभयो, “अस्पताल सञ्चालनका लागि डुमरियामा पटक पटक आन्दोलन भयो । सबै नेताले म सञ्चालन गर्छु भन्छन् । तर कसैले सकेनन् ।” जनताको समस्या बुझेर जसरी पनि अस्पताल सञ्चालनमा आउनुपर्ने उहाँले बताउनुभयो । जमिनदारविरुद्ध किसान आन्दोलन गरेका सूर्यनाथलाई २०४२ असोज ४ मा तत्कालीन पञ्चायती व्यवस्थाविरुद्ध पनि आवाज उठाउँदा गोली हानेर हत्या गरेको थियो । उहाँकै सम्झनामा अस्पताल निर्माण गरिएको हो ।