नवीनराज कुइँकेल
लमजुङ, माघ १२ गते । लमजुङको मर्स्याङ्दी गाउँपालिकामा भएकोे निःशुल्क आँखा जाँच तथा मोतियाविन्दु शल्यक्रिया शिविरमा एक सय तीन जना बिरामीको शल्यक्रिया गरिएको छ ।
तीन दिनसम्म सञ्चालन भएको आँखा जाँच शिविरमा नाै सय पाँच जनाले सेवा लिएकोमा एक सय तीन जना मोतियाविन्दु भएका बिरामीको शल्यक्रिया गरिएको हो । आँखामा विभिन्न समस्या देखिएका दुई सय ३७ जना बिरामीलाई चस्मा वितरण गरिएको मस्र्याङ्दी स्वास्थ्य शाखा प्रमुख लुल घलेले जानकारी दिनुभयो ।
मर्स्याङ्दी गाउँपालिका–७, ङादीस्थित भुलभुले स्वास्थ्य चौकीमा आयोजित शिविरमा नेपाल आँखा अस्पताल त्रिपुरेश्वर काठमाडौंका विशेषज्ञ डाक्टरसहित प्राविधिक टिमले सेवा दिएका थिए । शिविरलाई मुटु फाउन्डेसन काठमाडौं र मनोज एसोसिएसन फ्रान्सले आर्थिक सहयोग गरेको गाउँपालिकाका अध्यक्ष अर्जुन गुरुङले जानकारी दिनुभयो ।
शिविरमा नेत्ररोग विशेषज्ञ डा. प्रणव श्रेष्ठसहित आठ जना सम्मिलित प्राविधिक टोलीले सेवा दिएका थिए । शल्यक्रिया गरिएका बिरामीहरूको पुनः परीक्षण माघ २५ गते शिविर आयोजना गरिएको स्थलमै हुने वडा ७ का वडाध्यक्ष तिलबहादुर गुरुङले जानकारी दिनुभयो ।
आर्थिक अवस्था कमजोर भएका, आँखाको समस्या भएर पनि उपचारका लागि जिल्ला बाहिर जान नसकेका, असाहय नागरिकहरु शिविरबाट लाभान्वित भएको गाउँपालिकाले जनाएको छ ।
