सिराहाको बिच भागमा पर्ने पुरानो हाटबजारको केन्द्रका रूपमा रहेको सुखीपुर सात वटा गाउँपालिका मिलेर विसं २०७३ मा नगरपालिकामा स्तरोन्नति भएको हो । नगरपालिका बनाउन सुखीपुर, मोहनपुर, कमलपुर, विधानगर, कुसहा, लक्ष्मीनियाँ, कविलासी, सिलोर्वापछवारी र बलही गाउँपालिकालाई मिलाइएको थियो । कुल ५४.७८ वर्ग किलोमिटरमा फैलिएको यस नगरपालिकामा १० वटा वडा रहेका छन् । यसको पूर्वमा लक्ष्मीपुर पतारी गाउँपालिका, उत्तरमा धनगडीमाई नगरपालिका, दक्षिणमा बरियारपट्टी गाउँपालिका र पश्चिममा अर्नमा गाउँपालिकासँग सिमाना जोडिएको छ । किसानको बाहुल्य रहेको यस नगरपालिकाको विकासका लागि ‘समृद्ध सुखीपुर र सुखी सुखीपुर’ को नारा दिएर २०७४ सालमा र २०७९ सालमा गरी दुई पटक नगरप्रमुख चुनिनुभएका रामऔतार यादव नेकपा एमालेको केन्द्रीय सदस्यसमेत हुनुहुन्छ । दोस्रो कार्यकालका लागि निर्वाचित नगरप्रमुख यादवसँग गोरखापत्रका लहान समाचारदाता जीवछ यादवले गरेको कुराकानी :
ग्रामीण भेगमा रहेको सुखीपुर नगरपालिकाको विकासलाई के कसरी अगाडि बढाइरहनुभएको छ ?
अहिले यहाँका १० वटै वडामा सडक सञ्जाल विस्तार भएको छ । यसले सुखीपुरलाई थप सुगम बनाइरहेको छ । करिब २७ किलोमिटर पिच सडक, २० किलोमिटर आरसिसी ढलान र ग्राभेल सडक बनेका छन् । सडक सञ्जालको विस्तारले यहाँको विकासलाई गति दिएको छ । यद्यपि केही वडामा पुग्न बर्सातको समयमा गागन नदीमा आउने बाढीले समस्या पारिरहेकै छ । त्यसको समाधानका लागि पुल निर्माण अत्यावश्यक छ । त्यसका लागि सङ्घीय सरकारबाट बजेट पनि आइसकेको छ । पुल निर्माण भएपछि यस क्षेत्रको सबै समस्या समाधान हुने छ । ग्रामीण भेगमा नाला निर्माण सरसफाइलाई गति दिएर सुन्दर सुखीपुर बनाउन लागिरहेका छौँ ।
शिक्षा क्षेत्रमा के कस्तो प्रगति हुँदै छ ?
सुरुमा यहाँको सामुदायिक विद्यालयको अवस्थामा सुधार ल्याउन निकै ठुलो चुनौती रहेको थियो । म आफैँ पनि शिक्षक पृष्ठभूमिबाट राजनीतिमा आएकाले सामुदायिक विद्यालयको सुधार गर्नुपर्ने आवश्यक्ता महसुस गरेको थिएँ । शिक्षाको विकास नभए समग्रमा विकास सम्भव हुँदैन भन्नेमा म स्पष्ट थिएँ । त्यसैले नगरपालिकामा रहेका २४ वटा सामुदायिक विद्यालयको सुधारका लागि निकै प्रयास गरियो । ती प्रयासबाट उत्साहजनक नतिजा आउन थालेको छ । छ वटा माध्यमिक विद्यालयमा ट्युसनको समेत व्यवस्था गरिएको छ । नियमित विद्यालय अनुगमन, शिक्षकको उच्च मनोबल, आवश्यक तालिम र अभिभावक सचेतना कार्यक्रमका लागि दुई करोड रुपियाँ वार्षिक बजेट विनियोजन गरेर शिक्षालाई सही मार्गमा ल्याएका छौँ । यस नगरपालिकामा रहेका जनता बहुमुखी क्याम्पस मोहनपुर, कमलपुर र रामजानकी बहुमुखी क्याम्पस सुखीपुर–८ मा गुणस्तरीय शिक्षा र भौतिक रूपमा भवन निर्माणलाई गति दिएका छौँ । यस्ता कार्यक्रमले ग्रामीण भेगका विद्यार्थीलाई सहरी क्षेत्रमा जानुपर्ने बाध्यताको अन्त्य गर्न सफल भएका छौँ ।
स्वास्थ्य सेवाको प्रवाहका लागि के कस्ता योजनासहित काम गरिरहनुभएको छ ?
यस नगरपालिकाका १० वटै वडामा आधारभूत स्वास्थ्य चौकी रहेका छन् । हरेक स्वास्थ्य चौकीमा आवश्यक उपकरणसहित दक्ष स्वास्थ्यकर्मी उपलब्ध गराएर प्राथमिक उपचारको व्यवस्था गरिएको छ । नगरस्तरीय अस्पतालमा यसै वर्ष प्रदेश सरकारको सहयोगमा १५ शय्याको स्वास्थ्य सेवा केन्द्र स्थापना गरे सेवा प्रवाह सुरु भइसकेको छ । एमबिबिएसस्तरको चिकित्सक, परीक्षणका लागि विश्वसनीय प्रयोगशाला उपलब्ध छ । नगरपालिकाले आवश्यक औषधी व्यवस्थापनका लागि बर्सेनि ८० लाख रुपियाँ बजेट विनियोजन गरेको छ । दलित विपन्न परिवारलाई थप उपचार गराउन जिल्लाबाहिर लैजानु परेको अवस्थामा सहयोगका लागि छुट्टै कोष राखेका छौँ । यहाँको स्वास्थ सेवा प्रभावकारी हुन थालेपछि वरपरका लक्ष्मीपुरपतारी, बरियारपट्टी, औरही र अर्नमा गाउँपालिकाबाट पनि बिरामी स्वास्थ्य उपचारका लागि आउन थालेका छन् ।
यहाँका किसानका लागि कस्तो योजना ल्याउनुभएको छ ?
नगरपालिकाले कृषि क्षेत्रको समग्र विकासका लागि सिँचाइको राम्रो प्रबन्ध गरेको छ । प्रत्येक १० कट्ठामा एउटा सिँचाइ मोटरको व्यवस्थापन, पायकपर्ने ठाउँमा मलखाद्यको व्यस्थापन गरेको छ । धान, तरकारी र अन्य नगदे बालीको उत्पादनका लागि आवश्यक कृषि तालिम र प्राविधिक तालिम नियमित रूपमा दिँदै आएको छ । बजार व्यवस्थापनमा ध्यान दिएर कृषकलाई आत्मनिर्भर बनाउन र कृषि मजदुरको उचित पारिश्रमिकका लागि समेत नगरपालिकाले पहलकदमी गरिरहेको छ ।
नगरपालिकाको लडकनहा, सलमपुर, छजना, कुसहा, दहिपौरी बलही, सुखीपुर बनिया पोखरियालगायतका ग्रामीण भेगमा कृषि हाटबजार व्यवस्थापन गरेको छ । नगरपालिकाले कृषिको विकासमा गरेको सहयोगले वैदेशिक रोजगारीमा जाने युवाको सोचलाई पनि परिवर्तन गर्न थालेको छ । उनीहरूले यहीँ आफ्नो भविष्य देख्न थालेका छन् । म स्वयं पनि १२ वटा भैँसीपालन र सात बिघामा माछापालन गरी आफ्नो परिवारको भरणपोषण गरिरहेको छु । कृषि क्षेत्रलाई पर्यटनसँग जोड्ने हाम्रो योजना छ । अन्य क्षेत्रका कृषकसँग पनि यस नगरपालिकामा प्रयोग भएका प्रविधि र जैविक विधिबारे अनुभव आदानप्रदान गर्ने कार्यव्रmको सुरुवात गरिएको छ ।
नगरपालिकाले धान, गहुँ, रहर, मुसुरो र आलु, कोबी, भन्टा, गोलभेँडा उत्पादनको पकेट क्षेत्र तोकेर काम गरिरहेको छ । त्यस्तै पशुपालनका क्षेत्रमा पनि नमुना पालिका बनाउने योजना छ ।
पुरानो बजार सुखीपुर नगरपालिकाको केन्द्रमा रहेको छ । त्यसलाई कसरी व्यवस्थित गर्दै हुनुहुन्छ ?
अहिले सुखीपुर बजारको मुहार नै फेरिएको तपाईंले पनि देख्नु नै भएको होला । सडक, पूर्वाधार, क्याम्पस, अस्पताल, नगरपालिकाको भवन, पशु सेवा केन्द्र र कृषि बजारका लागि बनाएको सेड र आधुनिक बजारको स्वरूप धारण गरेपछि सुखीपुर आउनेलाई पटक पटक आउन आकर्षण गरिरहेको छ । थप विकासको प्रयास भने अझै रोकिएको छैन ।
स्थानीय तहको न्यायिक समितिप्रति भने धेरैको असन्तुष्टि देखिन्छ नि ?
यो प्रश्नले गम्भीर बनायो । न्यायिक समितिको कार्य सोचे अनुसारको प्रभावकारी हुन नसकेको हामीलाई पनि महसुस भएको छ । अब त्यसतर्फ सुधारक गर्नुपर्ने देखेर हामीले नगरपालिकामा छलफल चलाइरहेका छौँ । दाइजो नियन्त्रण, बोक्सी आरोप जस्ता सामाजिक विकृतिको अन्त्य र लागुऔषध नियन्त्रणका लागि चेतनामूलक अभियानलाई निरन्तरता दिइने छ ।
विपन्न दलित बस्तीमा गरिने सामाजिक र सांस्कृतिक कार्यका लागि गर्नुभएका प्रयास के के छन् ?
शीतलहरको समयमा न्यायनो लुगा वितरण गरिएको छ । विपन्न दलित बस्तीमा हुने सामाजिक सांस्कृतिक कार्यका लागि प्रत्येक वडामा पाँच÷पाँच वटासम्म सामुदायिक भवन निर्माण भएको छ । शुद्ध खानेपानीका लागि हरेक बस्तीमा हातेकल जडान गरिएको छ । यसबाहेक नगरपालिकामा आगो नियन्त्रणका लागि वारुणयन्त्र र स्वास्थ्य उपचारका लागि एम्बुलेन्स व्यवस्थापनमा नगरपालिका प्रदेश र सङ्घ सरकारबाट पहल थालिसकेका छौँ ।
